Skoolkore verstom in burgersentrum
Voorbereidingskool George was die gasheer van die 2018 Musiek Montage wat Dinsdagaand 22 Mei in die Georgeburgersentrum gehou is. Dit is waar plaaslike laerskoolkore die geleentheid gekry het om hul sangtalent ten toon te stel. Die tema van hierdie jaar se Musiek Montage was, ‘Musiek maak die wêreld kleurvol’.
Baie harde werk en oefen het ingegaan om die volgepakte burgersentrum in ongeloof te laat luister na die suiwer klanke en samesang wat die kore opgedis het.
Na die verwelkoming deur Lokkie Fourie is die verrigtinge afgeskop deur die SuidKaap Kinderkoor. Hulle is gevolg deur Laerskool George-Suid se junior koor,
Holy Cross se junior koor en die koor van Voorbereidingskool George.
Die hoof van Voorbereidingskool, AD Roux, het die amptelike bedankings gedoen waarna die eerste helfte afgesluit is deur samesang van al die bogenoemde kore.
Die tweede helfte het afgeskop met Holy Cross Primêr se vokale ensemble. Daarna het Laerskool Outeniqua se junior koor, Laerskool George-Suid se senior koor, Laerskool Outeniqua se vokale ensemble, Holy Cross Primêr se senior koor en Laerskool Outeniqua se skoolkoor hul talente ten toon gestel.
Die aand se verrigtinge is met luide applous afgesluit deur die senior massakoor, wat ‘n ABBA-potpourri gesing het.