GO GEORGE pas aan vir nog padopgraderings
Die volgende fase padopgraderings in George wat 'n uitwerking op die GO GEORGE-busdiens sal hê, begin einde Mei in Missionstraat, Rosemoor, 'n gedeelte van Parkweg en die serwituutpad langs CTM wat Knysnaweg en Parkweg verbind, en Caledonstraat.
Dit volg op opgraderings in Courtenaystraat wat reeds in Mei begin het en hopelik teen die einde van Julie afgehandel sal wees.
Missionstraat
Konstruksie sal plaasvind tussen die Industrial- en Millerstraatkruisings, met hierdie deel van die pad geheel en al gesluit vir ten minste 10 weke, waarna 'n 24-uur stop-en-ry-reëling sal geld met enkelbaanverkeer vir die res van die projek. Hierdie gedeelte van die opgraderings sal na verwagting teen die einde van November 2018 voltooi wees.
Die twee Rosemoor-roetes (53 en 53B) sal herlei word langs Industrial- en Grensstraat. Bushaltes wat geraak word, is 219 Sauer, 217 George High, 216 George High, 214 Rosemoor, 215 Rosemoor, en 623 Grens B.
Gedurende die tydperk van algehele sluiting sal 'n tydelike halte opgerig word in Grensstraat, na die kruising met Attakwastraat.
Enige ander tydelike haltes wat nodig geag mag word gedurende konstruksie, sal aan passasiers gekommunikeer word.
Parkweg en serwituutpad langs CTM
Konstruksie sal plaasvind op die serwituutpad vanaf sy kruising met Knysnaweg by CTM tot met sy kruising met Parkweg (slegs twee van die vier bane sal op 'n keer onder konstruksie wees). Konstruksie gaan voort in Parkweg tot by die Blue Mountain / Eden Meander-sirkel (sirkel uitgesluit), en sal na verwagting voltooi wees teen die einde van Augustus 2018.
Voertuie sal herlei word langs die ongeaffekteerde deel van die serwituutpad en Knysnaweg gedurende konstruksie. Bushaltes op die Rosemoor-roetes wat geraak word, is Eden Meander 20 en 21. Tydelike bushaltes, waar nodig, sal duidelik aangedui word met geel tydelike-halte borde en aan passasiers gekommunikeer word deur passasiersdienspersoneel.
Caledonstraat
Konstruksie sal plaasvind tussen Davidsonstraat en die treinspoorkruising met Bergstraat, en sal na verwagting teen die einde van September 2018 voltooi wees.
'n 24-uur stop-en-ry-reëling sal geld vir die duur van die projek, oor die volle lengte van die stuk pad onder konstruksie, met enkelbaanverkeer.
Roete 56 CBD-Denneoord sal geraak word, met alle ritte wat slegs in die kloksgewyse (vorentoe) rigting sal ry. Busse sal herlei word langs Symonds- en Adderleystraat. Bushaltes wat geraak word is 120 George Library, 121 Sandy McGregor, 119 Drostdy, 118 Drostdy, 572 Anland, 571 Darling, 271 Gardens, en 270 Gardens.
Tydelike bushaltes sal min of meer parallel met hierdie haltes opgerig word in Symonds- en Adderleystraat.
Die George-munisipaliteit maak verskoning vir die ongerief en doen 'n beroep op padgebruikers om geduldig en versigtig te wees naby die padwerke. GO GEORGE diensvertragings moet verwag word gedurende die konstruksietydperk.