Waterlek vir 3 maande by St Liboruis
Helen Thomas, Parkdene:
Die afgelope drie maande lek die water by St Liboruis-kerk in Parkdene waaraan tot nou toe nie aandag gegee is nie.
Hoe verduidelik ’n mens dat jy water moet bespaar, maar as daar wel ‘n lek is dan word daar absoluut niks aan die saak gedoen nie. Op 19 Maart bel ek die munisipaliteit om die probleem aan te meld. Die dame by ontvangs sou my bel, maar het niks van haar tot vandag toe laat hoor nie.
Intussen het die oproepe so gevolg: 17 April 2018 - 08:02, oproep na munisipaliteit
19 April 2018 - 08:02, oproep na munisipaliteit
20 April 2018 -15:38, oproep na munisipaliteit
24 April 2018, skakel ek Elton Michaels. Hy oortuig my hy sal 26 April my by die kerk ontmoet.
26 April 2018, SMS ons mekaar dat ons werkers daar sal wees as ek en hy mekaar mis. Ek wag nog steeds vir mnr. Michaels.
2 Mei 2018: soveel oproepe na Sebiena, die wyksleier wat my vertel van ‘n wyksleier wat ek nie eens ken nie, of sal ek sê wat niks beteken vir Parkdene nie!!! Die woorde "Ons gaan niks uitkry uit die munisipaliteit want dit is long weekend" en nog steeds geen oproep nie. Hierdie is die tweede waterlek by die kerk wat ons mee sukkel om die munisipaliteit se samewerking te kry. Hierdie een veroorsaak ook skade waaronder die kerk moet ly, wat nie reg is nie. Ek sal waardeer indien u terug kan kom met oplossing.
* Die brief is aan die George-munisipaliteit gestuur vir kommentaar, maar geen terugvoer is teen druktyd ontvang nie.
Reggie Wesso, direkteur van siviele ingenieursdienste, het egter in sy repliek op mev. Thomas se brief, verlede Vrydagoggend ontvangs van die brief erken en sy personeel versoek om dringend ondersoek in te stel na Thomas se gedetailleerde skrywe en daaraan aandag te gee. Thomas het gister gesê spanne het Maandag by die kerk begin werk tot laat die aand. Sy noem dat die probleem nou uitgesorteer is, "dis nog net die paving wat teruggepak moet word". Red