Galakonsert van Jong Musikante kompetisie
Die jaarlikse galakonsert van die Jong Musikantekompetisie vind op Vrydag 1 Junie om 19:00 in die Oakhurst Insurance Arts Theatre plaas.
Hierdie hoogtepunt op die jaarlikse musiekkalender word al vir meer as 30 jaar deur die Georgemusiekvereniging georganiseer om leerders die geleentheid te bied om hulle talente te ontwikkel, selfvertroue op te bou en aan die gemeenskap ten toon te stel.
Volgens die organiseerders is vele van die vorige deelnemers van die kompetisie tans professionele musikante, plaaslik sowel as internasionaal. Meer as sestig items was ingeskryf vir die oudisies wat op Maandag 7 Mei plaasgevind het. Die standaard was soos gewoonlik baie hoog en die beoordelaars Sue Rijsdijk en Marie Skeen, het ‘n moeilike taak gehad om die sowat dertig items uit te soek wat in die galakonsert moet wees. Die organiseerders is hierdie jaar baie beïndruk met die kwaliteit en diversiteit van die inskrywings wat harde werk geverg het vir beide die leerders en hul onderwysers. Daar is vir die eerste keer ‘n rock-groep gekies vir die galakonsert en verskeie komposisies wat deur die leerders geskryf is, sal ook uitgevoer word.
Uitstaande pianiste, klarinet-, dwarsfluiten blokfluitspelers, asook vokaliste gaan deelneem om trofeë en kontantpryse in die junior en senior afdelings van die kompetisie te wen.
Kaartjies vir hierdie feestelike musiekaand kan aanlyn gekoop word by www. georgemusicsociety.co.za en is ook by die konsert beskikbaar. Vir meer inligting kontak Sandra by 083 389 2775.
Die organiseerders is hierdie jaar baie beïndruk met die kwaliteit en diversiteit van die inskrywings wat harde werk geverg het vir beide die leerders en hul onderwysers.