Toutrek nou aangebied vir laerskoolleerders
Alle laerskoolleerders in George het nou 'n gulde geleentheid om aan toutrek deel te neem. Meeste sportsoorte vereis goeie balvaardighede, spoed, grootte en ander spesifieke talente, maar toutrek vra net entoesiasme en "vasbyt."
Toutrek is die sportsoort waar atlete teen hul eie portuurgroep deelneem. Die jongste ouderdomsgroep is o.9. Alle spanne bestaan uit agt atlete met 'n aanvoerder en hierdie agt atlete se gesamentlike gewig bepaal die afdeling waarin hulle dan sal deelneem.
Die ligste afdeling vir laerskooltrekkers is 230 kg. Dit beteken 'n gemiddelde gewig van nagenoeg 30 kg per trekker. Die swaarste afdeling vir laerskole is o.13 (400 kg) - 'n gemiddelde gewig van 50 kg per trekker.
Dogters is baie welkom om ook by die toutrek aan te sluit.
Toutrek is tans een van die vinnigsgroeiende sportsoorte in SA, veral onder juniors. Alle juniors in George word dus genooi om by die toutrekklub - by Van Kervel-skool (VKS) se velde op Dinsdae en Donderdae om 17:00 - vir oefeninge aan te sluit. Alle hoërskoolleerders wat graag wil aansluit, is ook welkom om by die VKSspanne in te skakel wat elke middag om 14:30 en saans om 17:30 oefen. Volwassenes wat belangstel, is ook welkom om aan te sluit.
Hierdie jaar is 'n besonderse toutrekjaar siende dat die wêreldkampioenskappe in Kaapstad aangebied word en VKS-George graag spanne sou wou inskryf om aan die internasionale ope kompetisies deel te neem.
Alle navrae kan gerig word aan Barries Barnard by 083 561 0964 of e-pos: janbarries@gmail.com, Anita Barnard by 082 680 8405 en Hector Odendaal by 072 700 7432.