Vyftigtalle vir George teen NMU Saasveld
George-rugbyklub se eersteen tweedespan in verlede
Saterdag se Presidentsliga (Kusstreek) teen NMU vyftigtalle behaal.
Die eerstes het NMU in 'n aanskoulike en klipharde wedstryd met 58-29 geklop en altesame nege drieë gedruk. Vir George het Adrian Maduna (vleuel), Nathan Church (senter), Johan van Wyk (vleuel), Nathan Scott (losskakel), Jeromius Claasen
(flank), Leon Swart (slot) en Brandon Pienaar (stut) elk een drie gedruk terwyl Jerome Claasen (flank) twee keer agter die doellyn gaan draai het.
Claasen het uitgeblink in alle fasette en sy teenstanders met sy harde duikslae en sterk lopies laat bontstaan. Die slotte, Leon Swart en Jacques Bothma, het telkemale hul teenstanders se balle in die lynstane gewen.
George se skrumwerk was ook puik met die stutte Brandon Pienaar en Leandrè Meyer voor in die koor.
Al die agterspelers het uitgeblink. Nathan Scott het 18 punte (1 drie, 5 doelskoppe en 1 strafskop) aangeteken.
George se tweedes het NMU met 56-0 kafgedraf en 10 drieë gedruk. Hulle is nou in die eerste plek in dié liga met nog 'n ekstra wedstryd in die hand.
Die driedrukkers was Johan Willemse (heelagter; 2), Reginald Jonck (vleuel; 2), Wynand van den Berg (vleuel; 2), Steven Horne (senter), Kotie Liebenberg (stut), JP Marshalle (slot), Devon Lee (skrumskakel) terwyl Lee ook met een doelskop geslaag het en Whayne van Wyk en Eugene Heyneke met een doelskop elk.
Saterdag kom George teen Eagle Stars op Outeniquapark te staan.
Die program is as volg:
14:15 - George B vs Eagle Stars B 16:00 - George A vs Eagle Stars A.