Progress kan vanjaar weer beker omhoog hou
André Stander
Die bulspan van Progress het Saterdagmiddag voor ‘n groot aantal toeskouers op die Rosemoor-sportterrein ‘n oortuigende oorwinning van 35-15 oor die nuweling in die SWD Premierligarugbykompetisie, Heidelberg, behaal.
Die verdedigende kampioenspan, wat vyf pragdrieë gedruk het, het met die vyfstervertoning getoon dat hul oor genoeg skietgoed beskik om weer die trofee op Saterdagmiddag 1 September op Outeniquapark omhoog te hou.
Dit was die wenspan se agtste oorwinning die seisoen en hulle is bo-aan die punteleer met 40 punte.
Progress het eerste bloed geruik toe hul oud-Arend-skrumskakel, Mzo Dyantyi, in die 4de minuut oor is vir hul eerste drie.
Hul agtsteman, Christo du Plessis, het in die 14de minuut gaan druk na puik skrumwerk deur die tuisspan. Fizell Fredericks (linkervleuel) het albei drieë verdoel. Die rustydtelling was 14-0.
Progress se plaasvervangers, Jean Volkwyn, Gaywin Smith, Ronaldo Baartman en Wendel Pondo het net na rustyd ‘n groot verskil gemaak.
Die wenspan se bulslot, Justin Levendal, is in die 43ste minuut oor vir sy span se derde drie. Fredericks het die drie verdoel.
Progress se spoedvraat, Ethan Williams, het die besoekers se doppie finaal geklink toe hy in die 46ste en 55ste minuut gaan druk het. Albei drieë is aangevoer deur Luzane Williams (buitesenter). Fizell het met albei doelskoppe geslaag.
Jason Liebenberg (plaasvervanger- losskakel) en Simon du Toit (slot) het Heidelberg se drieë gedruk. Corbin Swartbooi (heelagter) slaag met ‘n doelskop en ‘n strafdoel.
Vir die wenspan het Brianton Booysen (haker), slotpaar André Barnardo en Justin Levendal, en lostrio, Solomon Manxodidi, Jonathan Simons en Christo du Plessis voorlangs gekook.
Gladwell Jaftha (losskakel) en CarltonDee Coeries (binnesenter) was hul groot planmakers agterlangs. Veral Coeries, wat aangewys is as speler van die wedstryd, was uitstekend in die aanval en verdediging.
Jason Liebenberg (plaasvervangerlosskakel), Francois Pieters (binnesenter), Fernoldt Buis (linkervleuel) en Corbin Swartbooi (heelagter) van Heidelberg het agterlangs die oog gevang met hul spoed.
Voorlangs het die oud-Arend, Lyndon Hartnick (agtsteman) en Simon du Toit
(slot) vir die verloorspan uitgeblink.
Evergreens en Silver Stars het in ‘n opwindende wedstryd op die Pacaltsdorpsportterrein met 24 elk gelykop gespeel. Albei spanne het vier drieë gedruk.
Leegan Moos (heelagter), Marshall Boesak (buitesenter), J J du Toit (flank) en Llewellyn Treurnicht (slot) het vir Evergreens gaan druk. Moos slaag ook met twee doelskoppe. Dillan Kerspuy (2), Henrich Leukes en Shadrack Claasen het vir Silver Stars gaan druk. Neillin Scott en Henrico Scott slaag albei met ‘n doelskop.
Barbarians het in ‘n naelbytstryd vir Bridgton op sy tuisveld met 13-12 getroef. Jose Petersen (regtervleuel) en Winston Seconds (agtsteman) het vir die wenspan gaan druk. Wahlan Anthony (heelagter) slaag met ‘n doelskop.
Vir Bridgton is Anver Venter (buitesenter) en Rhupino Plaatjies (binnesenter) oor vir drieë. Keanin Esau (losskakel) klits ‘n doelskop oor.
Groot-Brakrivier het op sy tuisveld vir Crusaders met 14-5 geklop. Byrol Stuurman (flank) en Ashwill van Wyk (binnesenter) het vir die wenspan gaan druk. Crusaders se drieë is deur Livando Maxeke gedruk.
Die vreugdevure het Saterdagaand hoog gebrand in die Blanco-kamp nadat hulle hul eerste oorwinning die seisoen behaal het deur vir Maori’s met 26-25 te klop.
Thulani Njenje (flank) en Marshell Abrahams (slot) het die wenspan se drieë gedruk.
Clyde Davids (losskakel) slaag met drie strafdoele en Alain Jansen (plaasvervangerheelagter) klits twee doelskoppe en ‘n strafdoel oor.
Eben Moos (binnesenter), Llewellyn Khani (stut) is oor vir drieë vir Maori’s. Eben
Moos (binnesenter) slaag met ‘n strafdoel en Marshall Frans (losskakel) klits vier strafdoele oor.