Komposisies première by 10de Klassique
Klein Karoo Klassique, Oudtshoorn se fees van klassieke musiek, kuns, kos en wyn word van Donderdag 9 tot Sondag 12 Augustus aangebied. Verskeie komposisies première vanjaar by die tiende Klein Karoo Klassique.
Hieronder tel ‘n voorsmakie van MISA, ’n nuwe mis met ’n Suid-Afrikaanse invloed. Dié projek is vir uitvoerings by verskeie feeste en teaters in 2019 ontwikkel onder die kreatiewe leiding van Marthinus Basson. Antjie Krog is die teksskrywer en Antoni Schonken die komponis. Lede van die Kaapse Operakoor, Thando Mjandana, Ané Pretorius en Cecilia Rangwanasha sluit by Krog en Basson aan. MISA is Donderdag 9 Augustus om 18:00 te sien.
In The New Old - Die nuutheid van oudheid, bring Mareli Stolp (klavier), Waldo Alexander (viool) en Morné van Heerden (klarinet) twee nuwe SuidAfrikaanse werke vir die eerste keer na die verhoog. Arthur Feder se Rhapsody is gekomponeer as opdragwerk vir Samro en Clare Loveday se Clarinet Trio 1 is moontlik gemaak deur die Africa Open Institute for Research and Innovation.
Ook op die program is Igor Stravinsky se gewilde L’Histoire du Soldat. Hierdie uitvoering word Vrydag 10 Augustus om 14:30 aangebied.
Hugo Theart, waarnemende uitvoerende hoof van Kunste Onbeperk, sê die organiseerders, en kunstenaars is opgewonde om groot gehore op Oudtshoorn te ontvang. “Kaartjieverkope dui daarop dat die musiekuitvoerings baie goed ondersteun gaan word. Ter viering van Klassique se tiende verjaarsdag, is die fees een dag langer en bied ons tien uitvoerings aan, teenoor die agt van verlede jaar. Na die sukses van die laataand uitvoerings in Die Windpomp Restaurantteater word dié program ook uitgebou na drie optredes, teenoor verlede jaar se twee,” sê Theart.
Volgens Theart was daar vanjaar twee afslagpakkette vir Klassique beskikbaar. “Die eerste pakkette het blitsvinnig uitverkoop en ons het besluit om ’n tweede pakket beskikbaar te maak. Hierdie pakket gee aan feesgangers die geleentheid om elke noot van die hoofprogram te hoor, teen ’n besparing van R200.”
‘n Hoogtepunt is Night at the Opera deur die Charl du Plessis Trio. Hulle open die musiekprogram in die NG Moederkerk Donderdagmiddag om 14:30. Dit is ’n unieke reis met geliefde opera-arias uit Die
(Der Hölle Rache), Rigoletto (La donna è mobile), (E lucevan le stelle) en ander.
Pakkette kan by Computicket bespreek word en besprekings vir vertonings kan ook by 044 203 8600 of info@kunste.org.za gemaak word. Enige beskikbare kaartjies sal voor elke vertoning ook by die deure verkoop word.