Honderde by sitting oor grondonteiening
Garnett Wicomb & Hannes Visser
Honderde mense van die Groter Oudtshoorn asook plekke soos George, Mosselbaai en Groot-Brakrivier, het verlede Woensdag, 1 Augustus, die Nevada-gemeenskapsaal in Bongolethu volgepak vir die eerste sitting in die WesKaap oor die moontlike hersiening van Artikel 25 van die Grondwet.
Die waarde van die sittings word egter nou deur opposisiepartye bevraagteken nadat president Cyril Ramaphosa verlede Dinsdagaand, 31 Julie, aangekondig het die ANC het reeds besluit dat hulle 'n wysiging van die grondwet gaan aanvra.
Bonginkozi Madikizela, die DA-leier in die Wes-Kaap, het Woensdag gesê hulle wil weet waarom daar met sittings voortgegaan word as die ANC reeds besluit het wat hulle gaan doen. Volgens hom is die Wes-Kaap die enigste provinsie waar grondhervorming tot dusver suksesvol toegepas is met 'n suksessyfer van 62% teenoor die 9% van die res van die land.
Verskeie sprekers het Woensdag hulle menings ten opsigte van grondonteiening sonder vergoeding gelug. Volgens Kitty Jacobs van Warmbad, ondersteun sy die wysiging van Artikel 25 omdat die meeste plaaswerkers in haglike toestande woon.
Sydney Opperman, van Oudtshoorn en voormalige parlementslid, het gesê die aankondiging van Ramaphosa oor grondonteiening voordat die openbare sittings daaroor afgehandel is, is 'n belediging. Hy wou weet wat die doel van die proses dan is. Volgens hom sal dit ook nie 100% wees voordat die inheemse mense erken word nie.
James Jacobs, Khoi-stamhoof van Huis Herandien op Zoar, het gesê die Wes-Kaapse regering het 'n eensydige beskouing en gebruik steeds die apartheidswetgewing om die Khoi uit te verkoop. "Die president het nou die geleentheid om die Khoi se grond terug te gee," het Jacobs onder groot applous gesê.
'n Spreker van George, Keith Sharpe, het gesê die land benodig eerder wetgewing om korrupsie hok te slaan en die miljoene rande wat net verdwyn het, terug te kry.
Julian Klassen, ook van George, het gesê Suid-Afrika het ontaard in "varkhok armoede".
"Ons het onafhanklikheid, maar nog nie vryheid. Mense word nog steeds net uit hul huise gesit en moet in haglike toestande woon. Talle sonder toilette."
Celia le Roux, 'n boer van Vlakteplaas, het gesê: "My voorouers het ons plaas gekoop, nie gekry nie. Die Grondwet is reg soos dit nou is. Korrupsie is die groot probleem. Volgens haar is 25% van die land se grond reeds in staatsbesit. "Hoekom nie dit verdeel nie," wou sy weet.
Sien ook 'n video van Tertuis Simmers, inwoner van die Suid-Kaap en DA-lid in die wetgewer, by die sitting by www. georgeherald.com.