Tyd raak min vir ou Sassa-kaart
Brümilda Swartbooi
Begunstigdes wat maatskaplike toelaes van die Suid-Afrikaanse Agentskap vir Maatskaplike Sekerheid (Sassa) ontvang het minder as twee maande oor om die nuwe goue Sassa-kaart te bekom.
Sassa-kommunikasiebeampte, Lisa Kindo, sê Sassa is in die proses om die vorige diensverskaffer, Cash Paymaster Services (CPS), soos versoek deur die konstitusionele hof, uit te faseer.
Begunstigdes het tot 30 September om hulle ou Sassa-kaart vir die nuwe goue Sassa-kaart te ruil. Die Suid-Afrikaanse Poskantoor (Sapo) werk saam met Sassa om die proses vlot te laat verloop.
In George kan begunstigdes die nuwe Sassa-kaart by die Sassa-kantoor in Courtenaystraat, Sassa-betaalpunte, Georgeposkantoor en Thembalethu Thusongsentrum bekom. Hierdie ruilpunte sal Saterdae en Sondae vanaf 08:00 tot 13:00 oop wees vir begunstigdes om die nuwe kaart te bekom. Kontantbegunstigdes en persone wat hulle toelaes elektronies ontvang met 'n PIN by handelaars of OTM's moet hulle identiteitsdokument vir identifikasie en huidige Sassa-kaart saamneem na die ruilpunte.
Kindo sê begunstigdes wat hulle toelaes deur hulle persoonlike bankrekening ontvang, hoef nie hul kaarte te ruil nie, tensy hulle die wyse van betaling van hul maatskaplike toelae wil verander. Sodanige begunstigdes moet egter 'n toestemmingsvorm onderteken wat die direkte betaling in hulle bankrekening magtig. Sassa waarsku begunstigdes om nie vir die Green EasyPay-kaart aansoek te doen nie. Die EasyPay-kaart is 'n finansiële leningskaart wat geaffilieer is met die vorige diensverskaffer CPS. Die nuwe Sassa-kaart is goud.
Vir meer inligting kontak die Sassaoproepsentrum tolvry by 0800 60 10 11.
Voordele van nuwe Sassa-kaart
Geen onwettige aftrekkings.
Drie gratis kontantonttrekkings per maand by handelaars.
Een gratis kontantonttrekking per maand by die poskantoor.
Geen transaksiegeld word vir kaartaankope by handelaars gehef nie.
Die nuwe Sassa-kaart voldoen aan EMV (Europay, Mastercard en Visa). EMV is die wêreldstandaard vir kaarte met mikroskyfies. Daarom beskik die kaart oor baie beter veiligheidseienskappe.
Die kaart word aanvaar by alle handelaars en OTM's in Suid-Afrika wat die Visa-logo vertoon.