Trekker ry vir Kansa
Die ‘old lady’ oftewel die pienk trekker van die George-veteraantrekkers het Dinsdagoggend uit George na Riviersonderend vertrek om geld, ten bate van Kansa, in te samel vir Vrouedag. Marius Stander en 'n paar vriende van die Georgeveteraantrekkers sê hulle doen dit ten bate van Cancervive.
Vir hulle is dit belangriker om 'n verskil te maak, mense bewus te maak en in die proses geld te in vir die projek.
Stander sê elk van hulle gaan 'n beurt kry om te ry. Die groep het omstreeks 09:00 weggetrek by die George-hospitaal en gaan 'n paar stoppe langs die pad maak.
Mosselbaai en Albertinia is van die eerste stoppe en mense is welkom om foto's saam met die span en die trekker te neem.
Daar is ook 'n groot melkkan agterop die trekker waar donasies ingegooi kan word.
Frieda Henning van Cancervive, vir wie die geld ingesamel word, sê hulle fokus is eerstens om mense in te lig en om inligting omtrent die belangrikheid van vroeë opsporing deur te gee.
"Dit kan slegs gedoen word deur jou eie liggaam te ken en uit te kyk vir die simptome van enige kanker."
Cancervive is ook daar om hoop te gee, dat die siekte oorwin kan word, en nie die einde beteken nie. Die organisasie gee ook kankeroorwinnaars die geleentheid om hul stories te deel, en dis wat die trekkerrit so belangrik maak, vertel Henning.
Die Cancervive-span gaan saam met die pienk trekker aandoen by Mosselbaai, Albertinia, Riversdal, Heidelberg, Swellendam en dan Riviersonderend.
As jy meer wil weet kontak Henning by
082 335 4912.