Tienermeisie ontvoer en verkrag
'n Tienermeisie van Pacaltsdorp herstel tans van 'n nagmerrie-ondervinding toe sy deur 'n groep mans ontvoer en na bewering om die beurt verkrag is na 'n huisroof in die vroeë oggendure van Sondag 12 Augustus.
Die 16-jarige meisie is na die Georgehospitaal geneem vir behandeling waar sy berading ontvang het.
Volgens die Pacaltsdorp-polisie is vier mans Sondag in verband met die voorval in hegtenis geneem, maar net een 19-jarige verdagte het Dinsdag in die George-landdroshof in verband met voorlopige klagtes van menseroof en roof verskyn. Die saak is tot Dinsdag 21 Augustus uitgestel wanneer 'n borgtogaansoek na verwagting gebring gaan word.
Drie verdagtes is vrygelaat omdat hulle nie positief met die insident verbind kon word nie. Die ondersoek duur voort en meer arrestasies word verwag.
Die slagoffer was glo saam met vriende en familie by 'n huis in New Dawnpark toe die mans binnegestorm het.
Die verdagtes het die meisie gegryp asook selfone, skootrekenaars, klere en tekkies. Die rowers het toe te voet, deur die bosse, oor die Schaapkoprivier met haar geloop tot in Thembalethu waar sy na bewering verkrag is.
Sy het later die oggend weer te voet by die huis aangekom nadat sy vrygelaat is.
* A teenage girl was allegedly kidnapped and raped by a group of men in New Dawn Park shortly after midnight on Sunday. The kidnapping took place during a robbery where cellphones, laptops and clothing were stolen by the men, who left on foot. The girl returned later after walking through the veld from Thembalethu. One man (19) appeared in the George Magistrate's Court on Monday on provisional charges of abduction and aggravated robbery. He will appear in court again on Tuesday 21 August for a bail application.