Nagtelike inbrake by drie winkels in Yorkstraat
Kristy Kolberg
Twee fietse met ‘n gesamentlike waarde van R135 000 is vroeg Dinsdagoggend, 13 Augustus, by die Coimbra Cycle House-fietswinkel in Yorkstraat gesteel.
Een van die fietse, ‘n Specialised Turbo Levo FSR Comp 6Fattieelektriese fiets is R85 000 werd.
Die ander fiets, ‘n padfiets, se waarde beloop R50 000.
Die verdagte(s) het ook by RT Solutions, ‘n rekenaarwinkel, probeer inbreek, maar kon nie verby die veiligheidshek kom nie. Die motorfietswinkel, The Bike Shop, was ook ‘n potensiële teiken, maar die eienaar Attie Stols, het die inbrekers afgeskrik toe hy vroeg die oggend sy winkel oopgesluit het.
“Ons hou Dinsdaeoggende vanaf 06:00 ‘n gebedsgroep in die winkel en ek het om 05:30 die winkel kom oopsluit. Ná die vergadering het ek gesien dat die venster agter in die winkel gebreek is.
Op die kringtelevisie-beeldmateriaal kon ek sien hoe die mans by die venster uitklim toe ek die winkel oopsluit,” het Stols aan die George Herald gesê.
Volgens voorlopige inligting het die verdagtes met die fietse in die rigting van Dormehlsdrift gevlug.
Enigiemand wat die fietse gewaar, of inligting het rondom die voorval, kan Leon Rossouw by 079 240 3491 kontak.