Vrou aangeval deur veghond
Brümilda Swartbooi
Leonie Ruiters (55) van Pacaltsdorp is Saterdagaand 4 Augustus omstreeks 21:00 met ernstige beserings na Georgehospitaal geneem nadat sy deur ‘n veghond aangeval is. Die voorval het naby haar suster se huis in Cycadstraat plaasgevind waar sy vir haar kleinkind gekuier het.
“Nadat ek my suster se erf verlaat het, het ek iets agter my gehoor.
Dís toe die hond my bespring,” het Ruiters vanuit haar hospitaalbed vertel. “Die hond het my voete gebyt en toe my bene. Hy het my aggressief rondgeruk.”
Ruiters het om hulp geroep en gebid dat die nagmerrie moet eindig. ‘n Buurman het haar te hulp gesnel. “Ek was in pyn en het in my eie bloed gelê. Volgens my dokter sou ek dood gewees het as die man nie tot my redding gekom het nie.”
Ruiters is steeds in die hospitaal en die veghondeienaar se ma het haar daar besoek.
Haar pleidooi aan eienaars van alle veghonde is om behoorlike veiligheidsmaatreëls by hulle huise in plek te stel sodat mense nie aangeval word nie.
Senior inspekteur Salomé
Bruyns van Tuinroetedierebeskermingsvereniging (DBV) sê: “Diere wat mense aanval of beseer weens nalatigheid word gereguleer deur die Wysigingswet op diereaangeleenthede wat toegepas word deur die Suid-Afrikaanse Polisiediens. Wetstoepassing moet ook optree onder die bywet.”
Ruiters se dogter, Christelle, sê haar ma beplan om die aanval by die polisie te rapporteer sodra sy uit die hospitaal ontslaan word.