Pienk trekker maak hande oop

Die pienk trekker wat verlede week uit George vertrek het om geld in te samel vir Cancervive het wyd belangstelling langs die pad gelok. Selfs die polisie op Riversdal het die trekker 'gestop'.

Die publiek se hand was wyd oop om ‘n donasie te maak in die blou melkkan agterop die trekker en is ongeveer R16 000 vir Cancervive ingesamel.

Marius Stander, eienaar van die trekker, en Frieda Henning van Cancervive wil elke persoon wat ‘n donasie gemaak het, hartlik bedank.

"Julle donasie gaan help om ‘n verskil aan kankerstatistieke te maak." Daar is besluit dat hierdie rit na die Wes-Kaap veteraantrekker- en enjinskou elke jaar ‘n instelling gaan word. Daar word ook beplan om dit volgende jaar te kombineer met ‘n fietsaflos. Meer inligting is beskikbaar op hul Facebook-blad, Pienk Trekker vir Kanker. Vir die wat graag 'n donasie wil maak, hul bankbesonderhede is ook beskikbaar op die blad.

* Die George Herald het verlede week verkeerdelik berig dat die fondsinsameling vir Kansa is. Die fondsinsamelingprojek is vir Cancervive, 'n nie-winsgewende organisasie aan die stuur van bewusmaking- en opvoedkundige projekte onder die organisasie, People Living With Cancer.

Die polisie op Riversdal ‘moes’ natuurlik die trekker stop om te kyk of al die nodige lisensies en permitte op datum was. Gelukkig was dit! Almal het lekker gekuier langs die pad by hulle en die geleentheid gebruik om vir elkeen ‘n bewusmakingsbrosjure in die hand te stop. INLAS: Die blou melkkan agterop die pienk trekker waarin mense hulle donasies gegooi het.