Veldblomskou terug na reën
Die Clanwilliam-veldblomskou is terug en word vanjaar gehou van Vrydag
24 Augustus tot Sondag 2 September. Bykans 350 plantspesies, almal uit die Clanwilliam-distrik, word by die skou in die Blomkerk op die dorp ten toon gestel.
Hierdie immergewilde skou is verlede jaar gekanselleer weens die droogte en die kansellasie het blomliefhebbers diep geraak. Met die sluise van die hemel wat die laaste ruk oopgebars het, sal die natuurlike velde in die Cederberg-streek en omliggende dele ontwaak in ’n helderkleurige ontploffing van blomme. Kaapse Natuurbewaring verwag ’n uiters suksesvolle blomseisoen. Die velde is oortrek met verskeie soorte blomme soos die wit suikerkanne, kapokbosse, Clanwilliamdaisy asook die bekende geel suring.