Tafeltennis raak ál hoe gewilder

Tafeltennis in die Eden-distrik groei flink met ontwikkeling as deel van die sport se doelwitte vir die volgende 18 maande.

Organiseerders van die sport moedig ouers aan om hul kinders vir lekker sosiale oefensessies te bring sodat hulle die sport kan leer ken.

Maatskappye is ook welkom om betrokke te raak en in die sport te belê, aangesien hulle kampioene wil bou.

"Die beste jong tafeltennisspelers van die SWD het aan 'n week lange nasionale toernooi van 21 tot 30 Junie in Secunda deelgeneem en hul stempel afgedruk onder die topspanne in die land. Die o.13-span en senior speler Garshen Williams het almal onder die top-16 geëindig, wat 'n goeie prestasie is.

"Die o.16-dubbelsspan het 'n bronsmedalje na die Suid-Kaap teruggebring," vertel Garshen

Williams, voorsitter van die Edentafeltennisfederasie.

Die spanne is onder die Eden-Sportraad geaffilieer en die afrigters is Andrey Laminie en Williams en Heinrich

Pedro. Die nuut verkose komiteelede is Amelia Jansen, Anthea Williams, Pierre Swanepoel en Ashley Dyers.

"Ons is baie trots op wat ons spelers reeds bereik het. Ek wil ook al die ouers wat hul kinders in ons sorg geplaas het, bedank," het Williams gesê. "Die sport is ideaal vir ons omgewing aangesien dit binnenshuis plaasvind en ook 'n gesonde vorm van ontspanning bied. Daar is sosiale sowel as meer mededingende byeenkomste in George."

Belangstellendes kan Williams kontak by 071 207 0270 of garshenw@gmail.com.