George haal Presidentsliga se uitspeelrondes
Die rugbyklubs van George en Albertinia is onder die topses wat vir die uitspeelrondes van die SWD Presidentsligakompetisie gekwalifiseer het.
Albertinia lê eerste op die gekombineerde puntelys met 72 ligapunte en George tweede met 69 punte. Albei klubs speel op 25 Augustus op hul onderskeie tuisvelde in die halfeindstryd teen die twee wenners van die kwarteindronde, wat op Saterdag 18 Augustus gespeel word.
In die kwarteindrondes kom Springroses van Oudtshoorn, wenner van die Karoostreek met 59 ligapunte, te staan teen Jaquars van Plettenbergbaai, wat die sesde plek met 63 punte op die gekombineerde puntelys beklee. In die ander kwarteindronde kom Riversdal Blues (vierde plek met 67 punte) teen Mosselbaai (vyfde plek met 64 ligapunte) te staan.
Die klubeindstryde is op 1 September op Outeniquapark in George.
George se tweede span beklee die boonste plek van die gekombineerde puntelys (SWD Presidentsliga) en het saam met die Riversdal Blues vir 'n tuishalfeindstryd gekwalifiseer.