Rillernagte in Rooirivierrif
Die skrywer Jacob Rabie, is bekend vir sy boeiende rillers. Die nagtelike pogings om by sy huis in Rooirivierrif, asook ‘n huis langsaan, wat reeds ‘n jaar leegstaan, in te breek is egter ’n riller op sy eie.
Sy huis begrens ‘n oop stuk grond wat deurkruis word deur haweloses en by tye selfs plakkers huisves.
Nadat daar by dié leë huis in
Jan Heunisstraat ingebreek is, is sekerheidswagte aangestel om die eertydse spogwoning teen verdere stropings te beskerm.
Na bewering is die huis deur ‘n bank teruggeneem. Die raadop Rabie het sy dilemma in ‘n brief (sien die briewekolom) beskryf.
“Vir meer as ‘n jaar al het ons ‘n probleem met plakkers op die oop stuk grond tussen die huise en Kingswood se heining.
“Die munisipaliteit was al hier, maar het net hulle skouers opgetrek. Nou het dinge vererger.
“Die buurhuis (wat leegstaan) se koperwaterpype is afgesteel en die water het oorgeloop tot in ons erf en skade veroorsaak.”
‘n Loodgieter kon die water, wat uit die gebreekte pyp gestroom het, met noodherstelwerk stuit, het sy dogter Maryke Rabie tydens ‘n besoek van die George Herald bevestig.
Die stropers het drie maal waarvan hulle weet bo-oor tuinmure geklim om by die huis uit te kom. Die huurders van die voormalige luukse huis het die brandgevaar wat daar bestaan, vererger deur tuinafval bo-oor die muur te gooi.
Op die oop stuk grond agter die Rabies se huis is daar klere, ‘n beursie en boumateriaal wat blykbaar deur plakkers rondgestrooi is, gevind. Volgens Debra Sauer van die George se munisipale kommunikasieafdeling word daar wel opgetree teen plakkers. “George-munisipaliteit se beskermingsdienste-direktoraat voer daaglikse inspeksies uit in die betrokke gebied. Skuilings wat in aanbou is, word onmiddellik tydens die besoeke afgebreek. Talle skuilings is reeds verwyder.”