Fabriekstraat in Blanco is uiters gevaarlik

François Vogés, Blanco: Fabriekstraat, Blanco, wat in Voortrekkerstraat inloop, se beligting is baie swak en dit is baie moeilik om die voetgangers vroegoggend raak te sien.

Die sypaadjies is in 'n baie swak toestand en voetgangers het geen ander opsie as om in die pad te loop nie. Seker 95% van alle voetgangers wat die pad gebruik, werk by Fancourt en dra swart klere wat dit nóg moeiliker maak om die mense raak te sien. Verskeie mense is al amper raakgery. Tot dusver het my pleidooie op dowe ore geval. Iets móét gedoen word voordat iemand beseer word.

Die munisipale bestuurder, Trevor Botha antwoord:

Volgens die elektrotegniese beplanningseenheid het die straat genoegsame beligting, maar die munisipaliteit sal ondersoek instel en beligting daar hersien. Indien addisionele straatligte nodig blyk te wees, sal dit op die begrotingslys vir toekomstige installering geplaas word.

Siviele ingenieursdienste het ondersoek gaan instel en bevestig dat die sypaadjies tekens van insakking toon en dit is op sekere plekke te smal. Die sypaadjies sal gegruis word en tot 1,8 m verbreed word aan die noordelike kant van Fabriekstraat. Aangesien Fabriekstraat ‘n GO GEORGE-busroete is, is die opgradering van sypaadjies met plaveisel ‘n moontlikheid in die nabye toekoms.