Vandale saai verwoesting onder grafte
Connell, George:
Ons was gister (Donderdag, 16 Augustus) by my seun se graf in Yorkstraat en kom op omtrent 15 nuwe gevalle van grafskending af.
Dit is verskriklik hartseer en ons voel vir die mense wie se geliefdes daar lê. My seun se graf het gespaar gebly.
Is daar nie 'n oplossing nie?
Walter Hendricks, direkteur van gemeenskapsdienste, antwoord:
Vandalisme is ‘n probleem in George en oral in ons land. Die munisipaliteit beplan om beligting aan te bring in die Georgebegraafplaas in die huidige finansiële jaar as een van die maatreëls om die probleem van vandalisme aan te spreek. Ons simpatiseer met die geaffekteerde families en doen ‘n beroep op diegene verantwoordelik vir die skending van grafte om hulle te weerhou van hierdie sinnelose optrede. Die instandhouding van die begraafplaas is die funksie van die munisipaliteit, maar die instandhouding van grafstene bly die verantwoordelikheid van families.
Richard von Willigh, bestuurder van wetstoepassing, versoek die publiek om enige verdagte persone of vandalisme by die wetstoepassingsafdeling gedurende kantoorure aan te meld by 044 801
6350 of na-ure by 044 801 6300. Die wetstoepassingsafdeling onderneem om die gebiede meer gereeld te patrolleer.