SWD Arende pak Luiperds
Die SWD Arende se kanse om sy Curriebeker-veldtog Vrydagaand op Outeniquapark met 'n oorwinning af te skop, het 'n onverwagte hupstootjie gekry met die nuus uit die Noorde dat die Luiperds finansieel "op hul knieë is."
Die Suid-Afrikaanse Rugbyunie (Saru) se besluit om die kleiner unies se begrotings met 'n allemintige 52% te besnoei, het die Luiperds glo sleg onkant gevang.
Dié unie moes erg geld besnoei met onder meer skeidingspakette aan werknemers, die inkorting van sy reisbegrotings, kleiner salarisse aan spelers en, sekerlik die ergste besering, die vrystelling van sy voorste en mees ervare spelers.
Die Luiperdspan wat Vrydagaand teen die Arende uitdraf, is nie dieselfde as die een wat in die SuperSportuitdaagreeks gespeel het nie. Blykbaar is vier gereelde spelers nie weer beskikbaar nie en moes die keurders diep gaan delf onder die unie se o.21-spelers en Puk-studente om sy span vol te maak.
Die Arende-span was met druktyd nog nie bekend nie, maar hulle gaan gebuk onder beserings van twee sleutelspelers. Die losskakel, Robbie Petzeer, en die slot Cornell Hess is glo uit vir die res van die seisoen. Albei spelers het in die SuperSportreeks uitgeblink en veral Petzer se akkurate stelskopwerk sal gemis word. Maar daarvoor het hulle in Leighton Eksteen, heelagter, 'n meer as geskikte plaasvervanger.
Vergeet daarvan dat die Luiperds (dalk) met 'n verswakte span gaan opdaag. Dit gaan 80 minute se volle konsentrasie en goeie besluitneming verg om die besoekers te tem.
En die tuisveldvoordeel gaan vir die Arende nouliks iets meer as 'n gawe gedagte wees.