George het nie ‘n blouvlagstrand nie
Moenie verbaas wees as besoekers en inwoners traag is om hul tone in die see by strande in die Georgemunisipale gebied te steek nie. Net soos verlede jaar, het geen strande in die George-munisipale gebied blouvlagstatus gekry nie.
Die nasionale blouvlagprogram word onder die vaandel van die Natuurlewe-enomgewingsvereniging van Suid-Afrika (Wessa) aangebied.
Baie besoekers, veral uit die buiteland, gebruik dit as 'n maatstaf om te bepaal of dit veilig is om die see en strand in 'n bepaalde gebied te besoek. Strande moet aan streng vereistes voldoen voordat dit toegeken word. Dit hou verband met byvoorbeeld die watergehalte.
Die blouvlagseisoen open amptelik op 1 November. Altesaam 66 blouvlae is vanjaar toegeken, waaronder 46 strande en agt marinas. Die Wes-Kaap kan met die meeste blouvlagstrande spog en blouvlae gaan by 30 strande wapper.
In die Suid-Kaap is blouvlagstatus toegeken aan strande in die Hesssequamunisipale gebied, Mosselbaai, Knysna en Bitou.
Die strand by Wilderness het sogenaamde 'loodsstatus' (pilot-status). Dit beteken daar word gewerk om uiteindelik volle status te kan toeken.
Vincent Shacks, bestuurder van Wessa se Ecotoerisme-afdeling, het aan die George Herald gesê die blouvlagprogram in SuidAfrika het in 2001 begin en groei elke jaar. Destyds is blouvlagstatus aan slegs ses strande toegeken.
Munisipaliteite moet elke jaar aansoek doen. Die proses begin in Maart en munisipaliteite word sowat twee maande tyd gegee om hul aansoeke voor te berei.
Daarna word 'n terreininspeksie gedoen en vanjaar was die meerderheid aansoeke suksesvol.
Volgens Shacks is standaarde baie hoog en word elke jaar moeiliker. Dit is nie omdat die standaarde verhoog nie, maar eerder omdat dit moeilik is om die watergehalte te handhaaf en munisipaliteite se begrotings onder druk is.
George doen nie aansoek
Shacks het gesê George het nie aansoek gedoen nie. "Wessa was verras. George het uitstekende fasiliteite. Van die land se gewildste strande is in die gebied."
Bewerings het intussen die ronde gedoen dat die George-munisipaliteit 'n versoek om blouvlagstatus aan sy strande in sy munisipale gebied toe te ken, aan die Garden Route-distriksmunisipaliteit oorgedra het.
Memory Booysen, burgemeester van die munisipaliteit, het by navraag gesê sover sy kennis strek is so 'n versoek nie ontvang nie.
Die distriksmunisipaliteit heg hoë waarde aan blouvlagstatus en sal steun verskaf waar nodig. Hy kan slegs hulp verskaf as 'n versoek van 'n munisipaliteit ontvang word. "Ons doen alles in ons vermoë om blouvlagstatus te verseker."
Volgens hom kyk toeriste na die blouvlagstatus voordat hulle 'n gebied besoek. "Ons sal graag wil sien dat al die kusdorpe in die gebied blouvlagstrande het."
Hy het onderneem dat die munisipaliteit hulp sal verskaf om dit reg te kan kry.
Andricus van der Westhuizen, die DA se politieke hoof van die DA beheerde Georgestadsraad, het gesê die vraag wat gevra moet word is wat se kostevoordele dit inhou vir munisipaliteite en besoekers.
Hy dra nie kennis hoekom George nie aansoek gedoen het nie. "George se strande is bekend vir hul skoonheid en gehalte sonder dat hulle blouvlagstatus het."
Daar moet ook ingedagte gehou word dat George se strande in spitstye 'n beperkte aantal besoekers kan dra.
Volgens hom behoort daar ondersoek ingestel te word na die kostevoordele, kostes van die omgewingsregulasies en die infrastruktuurvereistes.
Trevor Botha, George se munisipale bestuurder, het gesê om blouvlagstatus te kry het koste-implikasies. Dit is om die proses te begin en dit daarna in stand te hou.
"George se strande is skoon en veilig.
Daar is lewensredders in die spitstye en dit het koste-implikasies." Wetstoepassingsbeamptes doen in veral die vakansieseisoen diens.
Botha het benadruk George-munisipaliteit staan nie negatief jeens die blouvlagprogram nie.