Galakonstert sluit etensuurkonserte af

Die pasafgelope Lente etensuur konsert reeks in die NG Moederkerk het weer aan Georgiete die geleentheid gebied om die hoë standaard van George se plaaslike talent te ervaar.

Georgiete wat nie die etensuurkonserte kon bywoon nie, kry Maandagaand 22 Oktober die geleentheid om 'n keur uit hierdie konserte te geniet tydens 'n galakonsert wat om 19:00 by die Moederkerk aangebied word.

Die ses gratis konserte is deur George Surgical Centre geborg. Pianis Dalene Steenkamp-Brits het die meeste van die begeleiding meesterlik hanteer.

Die reeks het begin met 'n tweeklavierduo met Dalene Brits en Kaléne Roux met werke van Bach, Mozart en Mihaud. Hol y Cross Prima rys e musiek departement was 'n lieflike toonvenster van die talent van die opkomende geslag musici. Sangers Elisabeth Potgieter en Heinrich Jonck het kragte met Elize Munro (klarinet) en Dalene Brits saamgespan in 'n program van liedere en duette. Werke van onder meer Schubert, Mendelssohn, Grieg,

Liszt en Schumann was op die program.

Die Klaralt-trio met Elize Munro, Ingrid Robinson (altviool) en Dalene Brits het 'n program van Mozart-, Schumann- en Bruchwerke gespeel.

Die trio vorm 'n besondere kombinasie van instrumente. Virtuose werke vir die fluit is deur Ruan van der Vyver en Dalene Brits opgevoer. Poulenc se fluitsonate en Borne se briljante fantasie op temas uit Carmen was op hierdie program.

Die reeks is afgesluit met 'n konsert van orrel- en klavierduo's met Dalene Brits en Gerrit Jordaan. Tydens dié konsert is Brits se aangrypende verwerking op die Magaliesburgse Aandlied gepremière.

Die konsert is gratis, maar donasies is welkom na afloop van die konsert.