Nog ‘n prestasie vir George-swemmer
Minke Janse van Rensburg, die Downsindroom-sportvrou van George wat diep in mense harte gekruip het, het nog 'n prestasie op haar kerfstok. Sy het 'n Bokkietoekenning van die gemeenskapsradiostasie, Bokradio verower.
Die 14-jarige swemmer is aangewys as die instansie se junior sportster van die jaar.
Dit is by navraag deur haar pa, Hennie Janse van Rensburg bevestig.
Sy het meegeding teen sportsterre wat nie gestremd is nie. Onder hulle was Valco van Wyk (paalspring), Adriaan Alberts (rugby) Neil van der Vyver (motocross) en David Kellerman (rugby). Hulle het almal nasionale klere in hul onderskeie sportsoorte verwerf. Minke het vanjaar al deelgeneem aan die 9de Downsindroom Wêreldkampioenskappe in Kanada. Daar het sy twee silwer- en twee bronsmedaljes gewen. Sy het ook 'n goue medalje verower, 'n sogenaamde "heat gold". (Sy was die junior wenner in die 50 m-vryslag). Op die oomblik hou sy drie wêreldrekords en ook 10 Afrika-rekords.
Minke kan in die afsienbare tyd dalk nog 'n toekenning agter haar naam skryf. Sy is 'n finalis is een van die afdelings vir die nasionale departement van sport en reaksie se toekennings. Die geleentheid vind op 11 November in Bloemfontein plaas.
Minke is saam met twee ander sportsterre genomineer in die afdeling, Nuweling van die jaar.
Volgens Janse van Rensburg is Minke nog jonk en sy swem omdat sy dit geniet.
"Sy het 'n baie goeie afrigter, Sybeth Hughes.
Sy was ook die afrigter van Philip Weideman, 'n Downsindroomwêreldrekordhouer in swem. "Sybeth se benadering is dat Minke jonk is en dit is belangrik dat sy dit geniet terwyl sy oefen om vinniger en fikser te word."
Die mikpunt is dat Minke gereed sal wees om SuidAfrika te verteenwoordig by die "Global Games for people that are intellectually impaired" wat aanstaande jaar in Oktober in Australië plaasvind. Voorts dat sy ook gereed sal wees vir die volgende DSISO (Down Sindrome International Sport organisation) wêreldkam-pioenskappe wat in 2020 in Turkye plaasvind. Janse van Rensburg het benadruk dat Minke se volgende internasionale deelname sal afhang van die beskikbaarheid van geld. Hy het almal bedank wat al gehelp het om dit vir Minke moontlik te maak om mededingend te kan swem.