Pacaltsdorpers ‘lank genoeg oor die hoof gesien’
Alida de Beer
Die Pacaltsdorp Tradisionele Kulturele Khoisanraad wil inwoners van Pacaltsdorp mobiliseer om deur protesoptrede aandag te vestig op hul ontevredenheid oor "afskeep dienslewering" en die owerhede wat hulle "oor die hoof sien" wanneer belangrike besluite geneem word.
Hul griewe en 'n toekomstige plan van aksie is verlede Woensdagaand, 17 Oktober, by 'n vergadering by die Eagle's Nest-sentrum onder die loep geneem.
Leiers uit verskeie oorde van Pacaltsdorp is daarheen genooi, maar nie almal het opgedaag nie.
Daar is groot ongelukkigheid in die Khoisanraad en onder baie Pacaltsdorpers oor hoë misdaadvlakke, die polisie se diens, 'n gebrek aan sosio-ekonomiese ontwikkelingsinisiatiewe, munisipale dienslewering, die power toestand van paaie, gebrek aan behuising, en die ongeregtigheid van die verlede ten opsigte van grondonteiening wat steeds nie reggestel is nie.
Die sentiment is uitgespreek dat Thembalethu se inwoners "goed regkry weens hulle betogings".
Die Le Grand-ontwikkeling was ook 'n teer punt. Een spreker het verwys na 'n R10 miljoen bydrae wat die oorspronklike ontwikkelaars vir opleiding aan die gemeenskap beskikbaar sou gemaak het. Slegs R900 000 is uitbetaal voor die ontwikkelaar bankrot gegaan het. Die ontwikkelaar moes ook die Gwaingpad geteer het, wat nooit gebeur het nie.
Daar is verder ongelukkigheid oor ontwikkelaars van buite George wat aangestel is om die behuising by Edenpark te bou. PBI-raadslid Virgill Gericke, 'n genooide gas, het verduidelik: "Ons is nie anti-wit nie. Daar is baie wit besigheidsmanne in George wat bereid is om vennootskappe aan te gaan met die locals. Gee die kontrakte vir hulle dan gaan die geld nie uit die dorp uit nie." Een spreker het geprotesteer oor nuwe ontwikkelings wat oral opspring sonder dat Pacaltsdorpers vooraf insae in die goedkeurings het.
Gericke het gemaan dat dit nie help om te protesteer teen die eiendomsontwikkelings nie, want dis wettig goedgekeur. "Ons moet sorg dat ons betrokke is by die formulering van die beleid in terme waarvan die goedkeurings verleen word."
Stanley Laminie, voorsitter van die Khoisanraad, was van mening dat verandering nie oornag sal plaasvind nie en 'n pleidooi gelewer dat alle inwoners moet verenig.
"Die Bybel is misbruik ons mense te verarm en ons grond te vat. Die tyd het gekom dat ons die Bybel gebruik om te sê, 'maak reg'. Ons moet Pacaltsdorp tot stilstand bring op 'n wettige manier. Ons moenie goed brand nie."
Sam Wagenaar het beaam,
"Ons moet verenig wees. Pacaltsdorp is bekend vir sy verdeeldheid. Ons moet een rigting inslaan en ons leiers moet verenig wees."
Nog 'n spreker het gevoel die Khoisanraad moet bewusmaking doen oor die historiese mishandeling waaraan die inheemse mense onderwerp is. Gericke het voorgestel dat meer leiers betrek word indien daar openbare optrede gehou gaan word en dan moet wettig daarvoor aansoek gedoen word.
Pastoor Jannie Horne het gesê Pacaltsdorp word omsingel "deur mense wat hulleself verryk" terwyl die inwoners self nie deel is van die ekonomie nie. "Ons word uit die prosesse uitgelaat. Ons moet korporatief opstaan, by die sleutelleiers uitkom, almal bymekaar kry en dan die pad vorentoe plot."
'n Opvolgvergadering is vir gisteraand, Woensdag
24 Oktober, belê nadat besluit is dat leiers oor 'n breër front by samesprekings betrek moet word.
Sessie oor wegbreek Soewereine Staat
'n Uitnodiging is uitgestuur aan die publiek na 'n inligtingsessie komende Saterdag, 27 Oktober, in Elsiesrivier in die Kaap wat handel oor die wegbreek van die Soewereine Staat van Goeie Hoop van die res van SuidAfrika.
Die publiek word deur Koning Khoebaha Cornelius, hoof van die Khoisan-koningshuis, daarheen genooi.