Crowd1-skema onder die loep
Twee regulerende liggame in SuidAfrika het verlede week aangedui dat ondersoeke teen die werksaamhede van die multivlakbemarkingskema, Crowd1, gedoen moet word.
Die gedragsowerheid vir die finansiële sektor (FSCA) het verlede week bekendgemaak dat Crowd1 nie as 'n finansiële diensverskaffer by dié liggaam geregistreer is nie en dus nie gemagtig is om finansiële dienste te verskaf nie. Die FCSA het die reserwebank van Suid-Afrika verlede week gevra om die skema te ondersoek.
Die tweede regulerende liggaam wat kommer oor Crowd1 uitgespreek het, is die Nasionale Verbruikersraad wat op 26 Junie in 'n verklaring aangekondig het dat hulle ook 'n ondersoek na Crowd1 gelas het nadat hulle 'n amptelike klagte ontvang het. Dit volg kort op die hakke van 'n voorbladberig in Rapport van voorverlede Sondag waarin verskeie sport- en vermaaklikheidsterre genoem word wie se name as reklame vir Crowd1 gebruik word. Oudtshoorn Courant, George Herald se susterpublikasie, het reeds 'n aantal weke gelede oor Crowd1 berig en die vraag gevra of dit 'n piramideskema of 'n geloofwaardige beleggingskema is.
Verskeie ekonome en finansiële kenners het op daardie stadium kommer uitgespreek oor die skema, maar daar was nog geen ondersoeke nie.
Finansiële kenners het mense afgeraai om aan Crowd1 deel te neem.