Van vernael na vers-vreugde
Die hoofdogter van Hoërskool Outeniqua, Annika van Santen (17) het op haar ma, Anli, se verjaarsdag vir 'n ekstra verjaarsdaggeskenk gesorg.
Van Santen het op dié dag gehoor dat sy haar onderskei het in die Poortskryfkompetisie van die Suid-Afrikaanse akademie vir wetenskap en kuns. Sy het met haar gedig, Vernael, 'n derde plek in die nasionale poësie-kategorie losgeskryf. Vernael is 'n werkwoord wat beteken om iets onbruikbaar te maak.
Volgens Van Santen was dit 'n groot verrassing. "Ek het toevallig van die uitslag gehoor toe 'n vriendin wat in Bonnievale bly (en as die nasionale wenner aangewys is) vir my 'n WhatsApp met die volgende woorde stuur: 'Geluk met jou gedig!' My ma was besig met 'n telefoongesprek toe ek op die stoep uithardloop met die goeie nuus. Ons hele gesin was oorstelp van vreugde," het sy vertel.
Volgens haar praat sy net so graag soos wat sy skryf. "Om aan lewendige debatte deel te neem, is vir my lekker," het sy gesê.
Sy skryf om sin van die lewe te maak en om sin aan haar lewe te gee. "Poësie neem mens op 'n intens persoonlike reis."
Die gedig waarmee sy die prestasie behaal het is middel November 2019 gebore toe sy op haar verjaarsdag diep teleurgestel is deur iemand. "Ek het die gedig geskryf in 'n poging om my hartseer en teleurstelling te probeer verwerk. 'n Vriend se bynaam vir my is 'Woordeboek'.
"Ek hou daarvan om deur die woordeboek te lees en het een middag op die woord vernael afgekom. Dit was 'n vreemde woord om te ontdek, maar die betekenis van die woord het my getref. Vernael is 'n werkwoord ('n aksie) wat beteken om iets onbruikbaar te maak. Toe ek die betekenis van die woord verstaan en snap, het ek besef dat dit presies is wat middel-November met my gebeur het. Ek het onbruikbaar gevoel en is as't ware onbruikbaar gemaak as gevolg van die diep teleurstelling."