Inwoners keer vir swak padwerke
Inwoners van Pacaltsdorp was Vrydag warm onder die kraag oor die manier waarop kontrakteurs herstelwerk aan Muisvoëlsingel gedoen het.
Joanie Visagie, 'n gemeenskapsaktivis, sê die pad loop reg voor haar deur verby en sy en ander inwoners kon nie terugstaan en toelaat dat sulke swak diens gelewer word nie. Hulle het toe die hulp van raadslid Virgill Gericke ingeroep nadat hulle die padwerke heeltemal tot stilstand gebring het.
Visagie sê dis nie reg dat die teer oor stormwaterdeksels gegooi is nie. "Ek het ook nie daarvan gehou toe een van die manne sê 'as die pad klaar is sal die water in ons huise instroom nie'," het sy vererg gesê.
Visagie, Gericke en ander inwoners het toe die munisipaliteit se siviele dienste afdeling gekontak om klarigheid hieroor te kry.
"Eers het ons die kontrakteur, Henra, se kantore gebel, maar is ingelig dat hulle as kontrakteur van George-munisipaliteit optree."
Visagie het selfs van haar besigheid se voertuie gebruik om die werkers te stop deur dit so te parkeer dat dit die pad versper. Die pad sou 'n dag neem om te herstel, maar die inwoners was ernstig dat hulle nie swak vakmanskap sal toelaat nie. "As ander mense nie van beter weet nie, wel ons doen," het sy gesê.
Sy en ander is belowe dat daar inspeksie gedoen sou word om seker te maak dat die werk wel reg gedoen is. Hulle het daarna toegelaat dat die werk voortgaan.
Debra Sauer, 'n woordvoerder van die George-munisipaliteit, het bevestig dat dit 'n munisipale diensverskaffer is wat in die betrokke straat werk. "Die siviele ingenieursdienste afdeling sal die kwessie met die betrokke diensverskaffer opneem en die nodige herstelwerk sal gedoen word."