Moenie dié eksamen jou naels kou nie: wenke wat werk
Dit is weer sulke tyd - eksamentyd - wat beteken heelwat huishoudings is besaai met lyntjiesblaaie, opsommings, wegneemetes ... en hope ekstra stres.
"Die tyd van die jaar hoor ek gereeld van kinders: 'Hoe gaan ek klaarkry? Die werk is net te veel!' Van ouers: 'Kom Boetie, bring jou kant … ek hét al gr. 4 deurgekom!'
Eksamentyd is vir baie ouers en kinders ‘n tyd van hoë spanning en angs." So vertel 'n plaaslike spelterapeut, Sanet Grobler, van Illuminated Growth, wat landswyd studiemetodekursusse aanbied.
"Hoewel die spanning rondom skoolwerk is, plaas dit gou stremming op familieverhoudings. Elke ouer weet, sodra ons konflik en trane in die huis het, is effektiewe leer by die deur uit."
Sanet verduidelik dat 'n eksamen ook gesien kan word as ‘n groeigeleentheid vir jou kind. "Nie net om hoë punte te behaal nie, maar ook om te ontwikkel in hul veerkragtigheid. Hulle oefen om spanning te hanteer en krities te kan dink. Dit is ‘n geleentheid om te leer van hardwerkendheid en deursettingsvermoë."
Daar 'n sêding wat lui: "Alles wat jy graag wil hê, lê net buite jou gemaksone."
Volgens Sanet is dit juis daar waar groei plaasvind. "Verwag dus ‘n spoedhobbel of twee, en wees daar vir jou kind – hulle het jou nou só nodig."
Sanet het op versoek van George Herald 'n paar wenke verskaf wat ouers kan help om spanning in hierdie tyd te verlig:
Tydsbeplanning
Jonger leerders veral benodig nog baie hulp met tydsbeplanning. Beplanning is ‘n hoër kognitiewe funksie, wat beteken dat jou kind se breinontwikkeling nog te kort skiet
om uit te werk hoeveel tyd aan watter vakke spandeer moet word. Maak egter seker jy maak jou kind deel van die beplanningsproses – sodat hulle kan oefen om krities te dink oor tydsbestuur, en sodoende daardie vaardighede kan ontwikkel. Op daardie manier is ‘n kind ook meer voorbereid vir leertyd.
Tyd vir ontspan
Skep doelbewus tyd in die leerrooster om te ontspan. ‘n Tyd om te ontlaai en kind te wees. In daardie tyd sal dit goed wees as jou kind aktief kan wees en vars asem kan skep.
Motivering
Neem ‘n oomblik om met jou kind te gesels oor wat hul graag in die eksamen wil bereik. Gesels oor hul doelwitte – nie net vir uitkomste en die punte wat hul wil behaal nie – ook doelwitte vir die manier waarop hulle wil leer.
Moeilikste eerste
As jy saam met jou kind hul leerrooster beplan, fokus op die moeiliker werk eerste. Op daardie manier sorteer hul eerste die uitdagende werk uit,
en kan ek die makliker werk doen as ek al moeg geleer is.
Skep ‘n leeromgewing
Dink aan die omgewing in jou huis, en hoe dit jou kind se leeromgewing beïnvloed. Is daar ‘n TV aan in die agtergrond of kou die hond aanhoudend aan sy tone? Probeer ook let op die gesin se roetine. Beperk baie kuiergaste of laataande oor die naweke. Dit is darem baie sleg om te sit en leer as die res van die gesin partytjie hou!
Oefen om eksamen te skryf
Dit is van kardinale belang dat jou kind toetsvraestelle uitwerk voor ‘n eksamen.
Op dié manier kry jy as ouer geleentheid om te sien of hulle die werk ken, maar ook om te sien hoe hulle inligting toepas. Jy kan hulle ook lei in hoe hulle vraestelle beantwoord, en seker maak hulle verstaan vrae reg.