Emile gaan SA weer in die buiteland verteenwoordig
Stilsit is 'n woord wat Emile Conrad, die gehardste brandbestryder in Suid-Afrika nie ken nie.
Conrad, (39), wat onlangs vir die soveelste keer die titel Toughest Firefighter Alive
South Africa (TFA-SA) agter sy naam kon skryf, is op die oomblik druk besig om voor te berei vir 'n internasionale kompetisie in Saudi-Arabië.
Hy en sy vrou, Bonita, wat saam met hom by die Tuinroete-distriksmunisipaliteit as 'n brandbestryder werk, vertrek op 29 Februarie na die buiteland vir 'n internasionale kompetisie. Hulle sal as 'n span deelneem, maar ook individueel. Hulle en nog twee ander brandbestryders van Kaapstad, gaan daar teen brandbestryders van meer as 20 lande meeding.
In September sal hy Suid-Afrika in Denemarke by die World Firefighterskompetisie verteenwoordig. "Dit is soos die Olimpiese Spele van brandbestryders."
Dit is 'n uitvloeisel van die Toughest Firefighter Alive South Africa-kompetisie wat hy in 2023 in Mosselbaai gewen het.
Conrad het Sondagaand op die TVprogram, Kwela meer vertel van sy besondere loopbaan. Hy het Dinsdag 20 Februarie, te midde van 'n druk program, tyd ingeruim om met George Herald te praat.
Hy is al byna 15 jaar in die beroep. Hy was voorheen in die houtwerkbedryf in Atlantis. In daardie stadium was
Bonita reeds in die beroep. Hy het dus
'n goeie idee gehad waaroor dit gaan. In
2009 het hy bedank uit sy beroep in die houtwerkbedryf en na George gekom vir brandbestrydingsopleiding. Hulle is in 2012 getroud en is ook hier gevestig.
Oor die jare het hy verskeie kere aan die Toughest Firefighter-kompetisie deelgeneem en dit vyf keer in 'n ry gewen. Hy het SuidAfrika in dié hoedanigheid in die buiteland verteenwoordig.
In 2022 was hy tweede en verlede jaar het hy dit weer gewen. Die kompetisie stel hoë eise en daar is vier verskillende fases soos onder meer 'n hindernisbaan.
Volgens hom is dit 'n uitdagende beroep. Dit is gevaarlik, maar hy het 'n passie vir sy werk.
Hy is 'n gelowige mens. "Dit dra my. Ek is
'n brandbestryder, want God het my hier met 'n rede geplaas."
Conrad beskou die kompetisie as iets positiefs want dit bied 'n platform waar hy mense positief kan beïnvloed. Dis ook 'n geleentheid om die beroep bekend te stel.
Fiksheid is nie vir hom onderhandelbaar nie, hy oefen minstens een keer per dag.
Dit help hom baie in sy werk omdat brandbestryders vir lank tye aanmekaar brande moet bestry.
Die egpaar het twee kinders. Hulle ken die brandweerstasie waar hul ouers werk. Hulle wil beide ook eendag brandbestryders word.