PA het nou 3 lede in George-stadsraad
Die nuwe wyksraadslid vir wyk 8 in die Georgestadsraad, Samuel Vorster, het onderneem om 'n verteenwoordiger vir al die inwoners in die wyk te wees - ongeag of hulle vir hom gestem het of nie.
Die 45-jarige Vorster het Maandag 19 Februarie, enkele dae nadat hy verkies is, met George Herald gesels.
Hy is verlede Woensdag, 14 Februarie, tot die stadsraad verkies nadat hy die munisipale verkiesing vir die wyk oorweldigend gewen het.
Dit beteken dat die PA nou drie raadslede in die George-stadsraad het. Twee is wyksraadslede en die ander een is 'n proporsionele lid.
Vorster het 1 272 stemme gekry wat byna dubbel soveel is as sy naaste teenstander, David Willemse van die DA wat 671 op hom verenig het. Levinia Wildeman van die ANC het 50 stemme gekry en Shumenta Malan van die EFF 34 stemme.
Die PA het Saterdag 17 Februarie 'n oorwinningspartytjie in Parkdene gehou wat deur sy nasionale leier, Gayton Mackenzie bygewoon is.
Ofskoon die stadsraad vir Vorster 'n nuwe terrein is, is hy geen groentjie in die politiek nie. Hy het al in 2016 by politiek betrokke geraak en destyds by die PBI aangesluit nadat hy genader is. "Ek het gevoel ek wil betrokke raak."
Einde 2021 het hy weens persoonlike redes
uit die PBI bedank. 'n Boodskap van Gayton Mackenzie, die PA-leier, het hom aangegryp en hy het by die party aangesluit.
Vorster is gebore en getoë in George.
Buiten die politiek is hy ook 'n stigterslid van vlakkiekrieket in George. "Ek het gesien daar is 'n tekort aan aktiwiteite vir die jeug in George."
Volgens hom is daar groot vraagstukke in die wyk wat al jare aankom. Dit sluit in werkloosheid, uitdagings oor die jeug, daar is nie 'n biblioteek in die gebied nie en ook nie 'n mobiele munisipale kantoor nie. Die naaste ander munisipale mobiele kantoor is in Conville. Dis 'n paar kilometer weg. Vir 'n bejaarde om daarheen te stap is ongerieflik en lewensgevaarlik. "Ek sal graag wil sien dat so 'n kantoor in die wyk gevestig word."
Hy sal hom beywer vir dienslewering en dat die blokkering van inwoners se krag opgehef word.
Vorster het reeds 'n PA-kantoor in die wyk gevestig en is van voorneme om nog te vestig.
"Dit is sodat ek vinniger en effektiewer met die gemeenskap kan kommunikeer."
Christo Alexander, PA-lid wat wyk 20 in die stadsraad verteenwoordig, het gesê die party is dankbaar teenoor die gemeenskap van George en Parkdene vir hul steun. Alexander het 'n groot rol gespeel in die PA se jongste oorwinning.
"Dis duidelik dat die gemeenskap reg is vir verandering. Die gemeenskap van George aanvaar die PA nou as alternatief. Binne ses maande is twee PA lede as wyksraadslede verkies."
Volgens hom was verlede Woensdag 'n groot oorwinning. Die PA was 'n onbekende party in die wyk.
Hy het gesê die DA is gestraf. Dit is omdat mense se krag geblok is en omdat PA-lede op sosiale media sleggesê is.
"Die uitslag is 'n goeie footprint met die oog op die nasionale verkiesing. Hierdie is net die begin en die PA gaan nog wyke wen."
Die PA sal met enige party in die George
stadsraad saamwerk as dit tot voordeel van die gemeenskap is.