Daar is altyd hulp en hoop
Ons voel soms of alles te veel raak en ons nie weet watter kant toe nie. Daar is druk by die werk, in verhoudings en in jouself.
Soms voel jy so vasgevang binne jou omstandighede en emosies, dat jy nie uitkoms of die groter prentjie sien nie. Maar jy besef ook dat jy nie so kan aangaan nie.
Daar is hulp
Volgens Nicolette Buitendag, direkteur van Families Suid-Afrika (Famsa) Outeniqua, is daar verskeie organisasies in ons omgewing wat hulp aanbied. Famsa Outeniqua is slegs een van hierdie organisasies.
"Ons lewer die afgelope 40 jaar dienste aan die George-gemeenskap, wat fokus op trauma, verhoudingsuitdagings en stressors. Opgeleide sielkundige- en maatskaplike werkers bied berading, en soms help 'n onpartydige persoon wat alle situasies vertroulik hanteer, juis om die groter prentjie te sien," sê Buitendag.
Dienste gelewer
Buiten dienste wat aan individue gebied word, bied Famsa ook hul dienste aan besighede rondom trauma-ontlonting, streshantering en ander onderwerpe.
Besighede kan ook 'n werksooreenkoms met hulle sluit om beradingsdienste op hulle perseel te lewer.
"Ons fokus op gesinsgeweld op verskeie terreine. Ondersteuning, praktiese hulp en berading word gebied aan slagoffers van gesinsgeweld en verkragting," sê Buitendag.
Famsa bied ook jaarliks verskeie opleidingsessies aan om die gemeenskap toe te rus om mekaar te ondersteun.
Kontak ons gerus vir ons basiese beradingskursus, trauma-ontlontingskursus, opleiding in die hantering van gesinsgeweld, asook rouberaad. Enige persoon bo 18 kan hierdie opleiding bywoon, al het jy nie ander kwalifikasies nie.
"Ons glo dat daar altyd hoop is, al voel dit nie so nie. Kontak ons gerus as jy vrae het of voel jy wil graag met iemand gesels. Daar is hulp beskikbaar," sê Buitendag.
Famsa lewer dienste aan volwassenes, tieners en kinders en beraders is ook in die satellietkantore beskikbaar in Thembalethu, Pacaltsdorp, Blanco, Conville en Rosemoor, asook by die kantoor in die dorp in Meadestraat 68.
Enige persoon wat graag berading wil ontvang, is welkom om die kantoor te kontak vir 'n afspraak.
Skakel Famsa by 044 874 5811 of stuur 'n e-pos aan george@famsa.org.za.
Hulle plaas ook weekliks artikels en inligting op hul Facebook- en webblaaie.