Munisipaliteit moet daadwerklik optree
Met verwysing na die artikel, 'Multi-sentrum kry kragopwekker ná substasie oppak' (George Herald,
15 Februarie), oor besighede in die Multisentrum wat vir vier dae sonder krag gelaat is.
Dit blyk dat ontoereikende beheermaatreëls deur die munisipaliteit plaasvind in die toepassing van die munisipaliteit se beleid met betrekking tot bates.
Bladsy 10 van die beleidsdokument gee duidelike opdrag dat: "Elke direkteur sal ten minste een keer in 'n finansiële jaar omvattende verifiëring van al hulle vaste bates onderneem."
Word dit gedoen? Indien wel, hoekom is die risiko van toeganklikheid tot die substasie nie al lankal aangespreek nie?
Bladsy 14 van die beleidsdokument verwys na bate-identifikasie: "Elke direkteur sal verseker dat die bateidentifikasiestelsel soos goedgekeur vir die munisipaliteit, nougeset toegepas word met betrekking tot alle vaste bates wat deur die betrokke departement beheer of gebruik word."
Bladsy 31 verwys na die bates wat ingesluit word, en substasies is ingesluit.
Bladsy 56 verwys na die bateverifiërings-proses en 'n "opgedateerde, relevante, en volledige vastebateregister". Dit sê dat dit geverifieer moet word dat alle bates soos opgeneem in die register bestaan, en dat dit in 'n bruikbare, werkbare toestand is sodat die waarde van die bates akkuraat gereflekteer kan word.
Dit blyk ook dat die munisipaliteit wat betref die substasie nie voldoen aan dievereistes van die boubeheerbywet en goed-gekeurde planne nie. Die munisipaliteit faal ook in hul aanspreeklikheid as die “enigste” verskaffer van elektrisiteit (benewens Eskom), soos uiteengesit in die elektrisiteitsvoorsieningsbywet, punt 4: “Slegs die munisipaliteit sal elektrisiteit voorsien of die voorsiening van elektrisiteit kontrakteer binne die voorsieningsgebied van die munisipaliteit, behalwe vir daardie gebiede waar Eskom die elektrisiteitsvoorsiener is."
Wie gaan vir die addisionele koste en verlies aan inkomste van die kleinbesighede aanspreeklik wees?
Die munisipaliteit moet daadwerklik optree teen onvoldoende toepassing van beleide deur personeel en die betrokke senior amptenare in hul persoonlike hoedanigheid aanspreeklik hou. Betaal Multisentrum of die munisi-paliteit vir die kragopwekker asook instandhoudingskoste totdat die substasie vervang word?
Die oudit- en risikokomitee en munisipale openbare rekeningekomitee (sonder politieke inmenging) behoort dringend na die akkuraatheid en geloofwaardigheid van die bateregister te kyk en die proses anders as 'n 'afmerkblokkie' (tick box) te benader.
George-munisipaliteit het by navraag gesê hy volstaan by sy kommentaar in die artikel.