Skole reg vir gróót aksie
GRAAFF-REINET — Na ‘n afwesigheid van drie jaar, maak die interskole kragmeting tussen Spandau en Asherville uiteindelik weer sy amptelike verskyning op Graaffreinet se skole-sport kalender.
Die organiseerders is reeds vir weke lank hard aan die werk om te verseker dat 2017 die herlewings-jaar van hierdie trotse tradisie sal wees. Die groot stryd sal op Maandag, 31 Julie, afskop en tot en met Saterdag, 5 Augustus, duur.
Beide skoolhoofde is ongelooflik baie opgewonde oor die herlewing van hierdie geleentheid en voel dat dit ‘n groot en belangrike rol speel in die moraal van die omliggende gemeenskappe van beide skole.
Eugene Mackelina, skoolhoof van Spandau Sekondêre Skool, beklemtoon die feit dat skoolgebeure soos hierdie leerders blootstel aan sportgeleenthede wat hul tydens hul skoolloopbaan sowel as na skool sal bevoordeel.
Hy voel dat dit ook vir ouers en die groter gemeenskap belangrik is, omdat dit hulle aanmoedig om betrokke te raak.
Mnr Grootboom van Asherville Sekondêre Skool voel ook dat dié interskole kragmeting tussen Spandau en Asherville herleef moet word aangesien die interskole nie nét oor sport nie, dit dien ook om die gemeenskappe bymekaar te bring om die jeug to ondersteun en aan te spoor.
Meer inligiting oor die interskole program en ander besonderhede met betrekking tot stalletjies ensomeer sal in die volgende uitgawe van die Advertiser verskyn.