Nuwe swemklub in Graaff-reinet gestig
GRAAFF-REINET — Die PEA en Aqua Bear swemklubs in Graaff-reinet het onlangs hande gevat en een nuwe klub genaamd die Graaff-reinet Swemklub gestig.
Hierdie klubs werk reeds jare saam met van Graaff-reinet se swemmers en het hulle dié swemmers bygestaan om uitstekende prestasies op provinsiale en nasionale vlakke te bereik.
Die nuwe klub, in samewerking met die menige skole in Graaff-reinet, is dit eens dat dié dorp oor geweldige swemtalent beskik sowel as uitstekende fasiliteite.
Die visie van die Graaff-reinet Swemklub is om verdrinkings te verminder en om swem in die platteland te bevorder.
Swem is nie alleen net uitstekende oefening nie, maar word daar ook ander lewensvaardighede ontwikkel en aangeleer soos self dissipline, selfvertroue, doelwitstelling, kommunikasie-vaardighede en goeie sportmansgees om net ‘n paar te noem.
Die klub wil graag alle swemmers aanmoedig om hul volle potensiaal te ontdek en ontwikkel.
Die klub bestaan uit vyf ervare en passievolle afrigters, waarvan vier provinsiale kleure in swem verwerf het asook twee wat provinsiale kleure in tweekamp verwerf het.
Ook op dié lys van die afrigters se prestasies is ‘n Sa-rekord in Lewensredding.
Die klub maak voorsiening vir alle ouderdomme - van klein babatjies tot ervare swemmers.
Die verskeie groepe waarby swemmers kan aansluit, sluit in: waterveiligheid, leer om te swem, aanleer van korrekte swemslae, junior, senior en elite groepe.
Daar is ook ‘n groep vir fiksheid en tweekamp. Die klub het reeds begin met sy bedrywighede vir die nuwe swemseisoen en is enigeen welkom om nog aan te sluit.
Enkele hoogtepunte op die program vir dié seisoen sluit in: ‘n swemkliniek aangebied deur een van die top afrigters van Port-elizabeth, Dave Glover (4 en 5 November), asook ‘n beginnersgala op Saterdag, 11 November.
Hierdie gala is vir swemmers wat nog nooit in ‘n A- of Bliga gala deelgeneem het nie.
Die klub wil graag die jeug van Graaffreinet blootstel aan swemgalas en gaan in samewerking met die verskeie skole die A-, B- en C-liga ondersteun.
Diegene wat meer inligting hieromtrent wil bekom, kan ‘n e-pos stuur aan grtswemgroep@ gmail.com of 072 794 1603 skakel.