Middelburg ACVV hou AJV
MIDDELBURG — Die Middelburg ACVV het op
10 Oktober hul algemene jaarvergadering gehou. Huis Karee en Bennie Boekwurm Speelskool is diensvertakkings van die ACVV.
Die ACVV se voorsitter, Me Y van der Walt het almal welkom geheet met spesiale dank aan die Departement Maatskaplike Dienste en ACVV se streeksbestuurder Me L van Zyl, wat die vergadering bygewoon het.
Pastoor Nico Luther van die AGS Lux Dei-gemeente het met skriflesing en gebed geopen waarna daar ʼn ysbrekertjie deur Rita Nienaber gelewer is. Sy het ʼn getroue weergawe gelees van hoe die Nama-stam die ‘Onse Vader’ interpreteer asook ʼn brief van ʼn Nama moeder aan die Here oor haar kind. Daarna het Van der Walt die voorsittersverslag voorgehou. Die ACVV se streeksbestuurder, Me L van Zyl, het die Visie en Missie van die ACVV met die vergadering gedeel. Sy het die kantoor se verslag van die afgelope jaar se beproewinge, uitdagings en hoogtepunte gelees.
Me A de Lange het daarna die Bennie Boekwurm Speelskool se jaarverslag gelewer. Me I van der Walt het Huis Karee se verslag ook voorgehou.
Mollie Stassen het met ʼn kort gedagte oor “Wat het jy vandag gedoen?” en gebed afgesluit. Daarna was daar heerlike verversings aangebied wat deur die personeel van Huis Karee en die ACVV voorberei is. Na ʼn baie suksesvolle 2017 jaarvergadering wil die ACVV en diensvertakkings almal wat die vergadering bygewoon het asook die gemeenskap bedank vir hulle ondersteuning.