Plaaslike kore span saam vir koorfees soos min
Engela Kruger
MIDDELBURG — Die Rhenosterbergtak van die ATKV in Middelburg in samewerking met CRAMTOUR het Donderdagaand, 19 Oktober, in die NG Kerk se ou-moedergemeente ‘n koorfees aangebied. Meer as ses honderd mense het in ‘n stampvol kerk hierdie besonderse koorfees bygewoon met die tema “Somernag in die Karoo’.
Dit was wonderlik om die kerk werklik stampvol te sien met alle sfere van die gemeenskap teenwoordig. Almal het die gehalte en skouspel terdeë geniet. Nege kore uit Middelburg se gemeenskap het ingeskryf vir die verskillende afdelings waarvoor daar meegeding kon word. Die drie afdelings was: primêre skool kore, sekondêre skool kore en volwasse kore. ‘n Algehele koorwenner van die aand is ook aangekondig. Drie beoordelaars het die kore beoordeel, naamlik Jaco van Deventer van Port-elizabeth, Dr Willem van der Walt en Desmond Minnaar van Middelburg.
Hulle is kenners van musiek en kore in eie reg. Die kore was van uitstaande gehalte en dit het die beoordelaars aan die einde van die kooroptredes stof tot nadenke gehad om die wenners te bepaal.
Die wenkoor onder elke afdeling was dan die volgende: Primêre Koor: Nonyaniso Intermediate Skoolkoor Sekondêre Koor: Ekumhumleni Skoolkoor
Volwasse Koor: Middelburg Harmony Voices
Die algehele koorwenner van die aand was die Nonyaniso Intermediate Skoolkoor
Die aand is afgesluit met ‘n treffende massakoorlied, ‘God Seën Afrika’, wat gesing is deur al die kore en die gemeenskap.
Die organiseerders se opregte dank gaan aan die ATKV en CRAMTOUR wat finansieel en logistiek bygedra het tot die reuse sukses van hierdie Koorfees.