Oosstraat Jong Vroue vier 20 jaar
Neco Bokwe
Die Oosstraat Jong Vroue het verlede naweek hul 20ste bestaansjaar by die Oosstraat Congregational Church gevier, 'n mylpaal wat met groot blydskap en dankbaarheid aangebied is. Die tema van vanjaar se vieringe, ontleen aan Psalm 118 vers 22, het die gees van veerkragtigheid en volharding beklemtoon.
Met die ondersteuning van baie toegewyde lede en ondersteuners wat die bestaan van die Jong Vroue met groot waardering beskou, het die vieringe 'n aangrypende en betekenisvolle ervaring gebied. Die organisasie, bestaande uit 19 lede, vier jaarliks hierdie geleentheid, wat begin het met 'n gesellige samekoms op Saterdagaand en afgesluit is met 'n spesiale erediens op Sondag.
Verskeie vroue van verskillende kerke was by die afsluitingsdiens teenwoordig en het hulle ondersteuning en bemoediging aangebied. Die erediens is verryk met pragtige musiek wat die gees van viering en dankbaarheid verder versterk het. Die visie van die Oosstraat Jong Vroue is om betrokke te wees by die werke van die Here, en hulle toewyding aan die ondersteuning van die ouer mense en minderbevoorregtes in hul gemeenskap is 'n bron van inspirasie vir almal wat betrokke is. Verskeie ander kerke het bygedra tot die sukses van die vieringe deur hul ondersteuning en deelname. Brenda Hector, voorsitter van die Oosstraat Jong Vroue-organisasie, het die geleentheid gebruik om almal te bedank wat 'n bydrae gelewer het tot die sukses van die hierdie jaarlikse fees. Haar hartlike dank is 'n weerspieëling van die diepe waardering vir die gemeenskap se ondersteuning en betrokkenheid.
Die toestand van begraafplase in die Dr Beyers Naudé munisipale area het oor die jare hewige reaksie ontlok, veral omdat daar soveel meningsverskille oor die instandhouding daarvan is.
Terwyl talle mense hare gekloof het oor wie se verantwoordelikheid dit nou éintlik is, het ‘n baie besondere jongman solank moue opgerol en self begin om die begraafplaas by die ingang van Aberdeen skoon te maak.
Luyanda McGear, aka Boss, vertel dat hy lankal begin het om die begraafplaas skoon te maak, maar dat hy dit nooit gedoen het soos wat hy dit hierdie jaar doen nie.
“Voorheen het ek maar wanneer ek my familie se grafte kom besoek sommer netjies gemaak rondom die familie se grafte. Maar hierdie jaar is dit tyd om dit ordentlik te doen. Van ‘n kant af.”
Dit doen McGear elke dag - nié omdat hy aangesê is om dit te doen óf betaal word daarvoor nie, maar omdat hy ‘n verskil wil maak - ten spyte van die feit dat hy werkloos is en geen brood op die tafel kan sit nie. Ek doen dit vir al my geliefdes wat in hierdie begraafplaas te ruste gelê is,” sê hy.
“As dit so bedoel is dat ek hieruit brood op my tafel kan sit dan sal dit so gebeur en ek sal geëerd wees. Ek wil graag hier werk. Miskien stel die munisipaliteit my aan? Miskien is daar 'n kontrak? Wie weet hoe en waar..."
Vir Aberdeen-inwoners was die onbaatsugtige manier waarop McGear hierdie diens lewer werklik ‘n riem onder die hart. Daarom het die Aberdeen Toerisme Assosiasie (ATA) begin om donasies in te samel om hom te vergoed vir sy harde werk.
Aanvanklik het hy net enkele donasies ontvang maar ten spyte daarvan dat hierdie donasies nie naastenby genoeg was om homself en sy gesin behoorlik te onderhou nie was hy baie dankbaar daarvoor en het hy onverpoosd voortgewerk met net een doel voor oë - om ‘n verskil te maak.
Drie van sy vriende, Percival Fick, Heinrich Saas en Curtlin Cloete het hom aanvanklik op naweke gehelp om die begraafplaas skoon te maak, maar spring nou ook elke dag in om te help.
McGear se groot deurbraak het gekom toe ATA onlangs besluit het om hom ‘n hupstoot te gee omdat hy besig is om een van die dorp se grootste toerismebates ‘n hupstoot te gee.
“Daar is lank en diep kopgekrap en gesels. Sonder om te veel uit te brei, sal McGear vir 'n wyle brood op die tafel kan sit. ATA gaan ook aan hom die middele beskikbaarstel om nuwe opslaan-onkruid te bestry,” vertel ‘n inwoner wat nou verwant is aan ATA.
Alhoewel ATA nou vir McGear as kontrakteur help, is die organisasie se fondse beperk.
Enige persoon wat bereid is om betrokke te raak om hierdie vier jongmanne by te staan kan Aberdeen-toerisme by 082 463 7014 skakel.