Halala Lwimindini oluncanc’ebeleni
Lubhiyozelwe ngodlwabevu lomsitho yiPuku usuku lwehlabathi olukhuthaza ukuthethwa kolwimi oluncance ebeleni. UTsepiso Nzayo noliqhula elaziwayo apha eRhini ubengumbhexeshi wenkqubo, kwayo akabadanisanga abo bebezokuzivela. Uxelele loo nginginya uhlobo ekhayeni lakhe kwakugxinisiswa ngayo isiXhosa. Uthe ukhumbula mhla wophula umhombiso wenja yeglasi eyayibekwe phezulu ekhabhathini, phofu engayekanga ukubethwa kuba emoshile.
“U-YO-PHU-LE-LE NTONI LE-NJA!” Yayingathi angagqibi umama wakhe kuba ikatsi yayisitsho, ingapheli. Uthe maxa wambi wayebanelishwa lokubethwa ixesha elide ngumakazi wakhe owayethintitha, nto leyo eyayimenza aphindaphinda ukubizana negama elinye nje.
uLikhaya Ngandi nobesamkela iindwendwe egameni likaMasipala waseMakana uthe “olusuku lumkhumbuza iimini apho babesakuhlala ngaseziko bephula-phule oomakhulu bebalisa amabali amnandi nanemfundiso.”
Ingenelele ngoko nangoko indlu, omncinci nomdala, nje akuthi okaNgandi, “Phaya entilini, kukh’unomasele …”
Kaloku kwakumnandi ngezo ntsuku, abantwana befundiswa Ubuntu, imbeko, intlonipho, izithethe, indalo kwakunye namasiko abo. Nangona ezinye iintsomi nabali ayesoyikisa, kodwa abantwana babekwafundiswa indlela yokuthetha nokubhala ngolwimi lwabo.
Unjingalwazi Mhlobo Jadezweni noxelenga kwidyunivesithi yaseRhodes uthe isikhumbuzo esinje simenzela ikratshi. Utyhilele indlu uhlobo awabeneentloni ngayo akufumanisa ukuba abantwana bakhe bobathathu abakwazi ukufunda ngesiXhosa. Oku wakufumanisa mhla babemxelela emnxebeni ngencwadi efikileyo ekhayeni, ishiywe ziindwendwe. Kwabanzima tu kubo ukuba bamfundele ukuba ithini na loo ncwadi. OkaJadezweni ukwathabathe eli thuba ekhumbuza indlu ukuba ihloniphe ooSEK Mqhayi nowasibhalela Ukuzika kukaMendi, watsho esithi nonyaka nje ngukhunjulwa iminyaka elikhulu sehlayo eso siganeko.
Ababezimase loo msitho bakwavavanywe ulwazi lwabo malunga nolwimi abaluthethayo. Ugqirha Msindisi Sam ubenzise upelo lwamagama anjengoo: ityholo; uqongqothwane. Ubuye wabenzisa amaqhalo nezaci anjengoo: yintlaka nexolo; indlala inamanyala; ubuhle bekhiwane ziimpethu. Apho kukhuphisene uNoluntu Mazibukwe, uSandile Saki kunye noSandisa Ndumo nabaye baphiwa iincwadi zokufunda zesiXhosa. Ithe yakuxinga inkala kubantu abadala, abaziyekela abantwana besekolo abanjengooYonelwa Maselwa nowenza ibanga lesithoba kwiskolo samabanga aphakamileyo iKhutliso Daniels. Lo kaMaselwa uxelele loo nginginya ukuba ukubambelela esebeni lomsintsi kuthetha ithemba elingekhoyo.
Umakad’enethwa uNomonde Ngesi noneminyaka engama-86 ubesisithethi sembeko. Ubalule ukuzazi ukuba “sivela phi, singoobani” singabantu abamnyama. Ukwagxininisile kuThixo uMdali, nokubaluleka kwemfundo.
“UThixo unguMdali wakho, unenjongo zokuphakamisa, hayi ukukutshabalalisa. Ibhongo lakho lazi, soze uThixo angakuxhasi,” ugxinisise watsho uNgesi.
Kwezinye zezinto ezonwabisayo, uAkhona Mafani noyimbongi eyaziwa ngelikaBhodl’ingqaka ukrobise uluntu ngecwecwe lakhe elitsha elithi ‘Iintonga Zetyendyana’ nazakulisungula kulomnyhadala wePuku ngoMgqibelo.
Lo msitho utshayelela umnyhadala wobaliso kwabali abantwana, noqala ngomhla wama23 – 26 apha kuFebruwari nozakube ubanjelwe eNational English Literary Museum.
• Ipapashwe Ngu: Zongezile Matshoba z.matshoba@nelm.org.za /
082 480 9698