Ulutsha maluthethe ngeengxaki oluhlangabezana nazo
Uchazwe njengomntu obenembeko, elihomba kwaye engumntu ohleli esonwabisa, umfundi ongasekhoyo waseNombulelo Secondary School, kwinkonzo yakhe yesikhumbuzo ebibanjelwe kwiholo lesi sikolo nge-4 kuCanzibe. uLelethu Diba, 19 webanga le-11 usweleke emva kokuzixhoma kwikhaya lakhe eliseJoza, eRhini kwiiveki ezimbini ezidlulileyo.
Liye lahlokoma yintsini iholo xa umhlobo kaLelethu, uSinovuyo Futuse ebalisa ngamini ithile wakhe wathi ngayo uLelethu ukuba yena ufuna ukubangunoteksi xa emdala. UFutuse uthi wayesoloko emkhuthaza umhlobo wakhe ukuba aye esikolweni nanjengoko wayengasithandi isikolo.
UMfundisi Pumzile Matiwane obeshumayela kule nkonzo, ukhuthaze abafundi ukuba bathethe nabahlobo babo okanye nabani na abamthembileyo ukuze bangatyiwa ngumvandedwa bade bacinge ngokuzibulala. Wongeze ngelithi abantwana xa bengxoliswa ngabazali babo mabangacingi ukuba abathandwa. “Umntu xa engxoliswa aboyazi into yokokuba ufakwa endleleni elungileyo,” utshilo uMatiwane.
Lo mfundisi uthe usathana ungena ebantwaneni ngokuthi abanike undlela-lula wokuba bacinge ngokuzibulala xa bethe bangxoliswa emakhayeni abo. Utsho ekhuthaza abazali ukuba babathandazele abantwana babo yaye esithi nabantwana mabamkele uYesu ukuze basinde kwikrele likasathana.
Umkhuluwa kaLelethu, uMasixole Kondile naye ukhuthaze abafundi ukuba bafunde ngokuzimisela yaye bathethe xa kukho into ebaphethe kakubi emphefumlweni. UKondile uthi ezinye zezinto azokuzikhumbula ngomninawa wakhe luncumo nenkuthalo yakhe. “Ebenobubele, ebethule kakhulu, enoncumo” utshilo uKondile. “Nalapha endlini ebeyi-handy man ethand’ ukusebenza,” wongeze watsho.
Inqununu yaseNombulelo Secondary School uNicci Hayes uthi esi sikolo silahlekelwe kuba njengaye namphi na umntu omtsha, uLelethu ebenekamva eliqaqambileyo. “Silahlekelwe yintyatyambo ebisazokuqhama,” utshilo uHayes.
Utitshalakazi kaLelethu, uNombeko Sinam uthe nangona uLelethu ebengasihambi kakuhle isikolo, bekucaca ngaloo mini athe waya ngayo esikolweni. “Ebedlala indima enkulu kwigumbi lokufundela angena kulo,” utshilo uSinam.
Ngokokutsho kukaKapteni wamapolisa eRhini, uMali Govender, kusenziwa uphando ngokusweleka kukaLelethu yaye akurhanelwa nto ingaphaya kweenkcukacha esele zikho ngelityala.
uLelethu ungcwatywe ngoMgqibelo nge-6 kuCanzibe. Inkonzo yomngcwabo iqale kwikhaya lakhe eliseJoza ze emva koko kwayiwa kwiholo yoluntu yale ngingqi ngaphambi kokuba aye kubekwa kwikhaya lakhe lokugqibela.