Huisgenoot Beste Resepte: Braai
VYFUUR SOGGENS BRAAI ONS BREKFIS
Vir Suid-Afrika se nuwe Afrikaanse sangsensasie Jo Black, hy met die lang baard en arms vol tatoeëermerke, is ’n braai nie ’n braai as daar nie beesvleis op die kole is nie.
’n Lekker kruis- of lendeskyf is presies wat die sanger met die diep stem verkies.
Wanneer dit by bykosse kom, eet hy die lekkerste aan sy vrou se braainoedels en knoffelbroodjies.
Elke bobaasbraaier het ’n geheime braaibestanddeel en Jo sê hy is “stout” oor grondboontjiebotter. Hy wil nie te veel oor sy resep verklap nie want, sê hy, “as ek vertel, is dit nie meer ’n geheim nie”. Maar hy deel tog een resep: “Jy marineer jou filet in ’n mengsel van regte botter, grondboontjiebotter en speserye.”
Jo verkies dit om op ’n oop vuur te braai want “’n gasbraaier tel nie as braai nie.” Hy meen vuur is die een ding wat mense oor die wêreld heen fassineer. “Maak nie saak hoe jonk of oud jy is nie, almal hou daarvan om na die vlamme te staar. Dis ook die beste ysbreker in enige geselskap.”
En hoe gereeld staar hý na die vlamme van ’n braaivuurtjie?
“Ek braai elke Vrydagoggend om 05:00. Ek noem dit die Be That Guy Breakfast Braai. Natuurlik braai ek ook ten minste een of twee aande in die week.”