SING-SING OM DIE VUUR

“Die vuur maak almal rustig en bring mense nader aan mekaar. Natuurlik help die glasie wyn in jou hand ook!” En dÍs waarom braai so gewild is, meen Jako Meyer, akteur en hoofsanger van die rock-groep Moses Metro Man.

Hy en sy meisie van die afgelope twee jaar, die onderwyseres Inge-Mari Daneel, is lief vir onthaal en braai tussen twee en vyf keer per week. Hulle volg die tradisionele roete, vertel Jako, en daarom is daar gewoonlik nie baie bykosse op die tafel nie.

“Ons hou baie van ’n aartappelgereg en braaibroodjies. Op my rooster sal jy gewoonlik ’n filet of ’n hoender-flattie kry. Die lekker ding van ’n

flattie is dat hy stadig en lank moet braai, wat jou natuurlik meer drinktyd gee!”

Braai speel so ’n belangrike rol in sy lewe dat toe hy en Inge-Mari ’n jaar gelede na ’n woonstel op soek was, sy enigste vereiste ’n kuiervertrek met ’n binnebraai was. “Sodat ’n mens in die winter ook kan braai,” verduidelik hy.

Jako, wat verantwoordelik is vir onder meer die temalied van die fliek Mooirivier, vertel dat wanneer hulle onthaal, kom die kitare gewoonlik “ná ’n hele paar wyne te voorskyn en dan sing ons tot die buurman ons kom stil maak”.