NUUT IN DIE FLIEKS / THE KEEPING ROOM
Oorlogsdrama. Met Brit Marling, Hailee Steinfeld en Sam Worthington. Regisseur: Daniel Barber. 16SG. Begin op 24 Junie.
Waaroor gaan dit?
Drie weerlose vroue bly tydens die Amerikaanse Burgeroorlog alleen op ’n plaas. Toe rondloperdrosters uit die weermag hulle bedreig, moet hulle eie reg gebruik om te oorleef. Die film speel af gedurende die gevreesde Carolinas Campaign van 1865, wat baie lewens gekos het.
Wie sal hiervan hou?
Dit is moeilik om die gehoor te bepaal vir hierdie oorlogsrolprent, wat ook ’n Western is. Vroue sal moontlik hiervan hou, want dit bring hulde aan dapper vroue wat alleen en sonder die hulp van ’n man die mas moet opkom en wat in ’n oorlogsituasie daarin slaag om te bly leef en die aanslae van wrede rondlopers die hoof te bied.
Wat in die rolprent se guns tel, is die sterk rolle wat aan goeie aktrises gebied word. Veral die onderskatte Brit Marling en Hailee Steinfeld blink hier uit.
Tog beweeg die fliek bitter stadig en dit kom soms selfs tot stilstand. Dis moeilik om deur hierdie feministiese Western te sit, want verveling wil plek-plek oorneem. Dit sal bes moontlik net in uitgesoekte teaters vertoon word en is op ’n beperkte smaak gerig. Wees gewaarsku: Daar is seksuele geweld.
Die landskappe word knap in die atmosferiese fotografie vasgevang, maar eindelik is dit nie ’n rolprent wat ’n mens opgewonde maak nie, behalwe vir die goeie spel. Sam Worthington bewys hy kan danksy sy knap karakterisering steeds ’n simpatieke mens maak van ’n man van twyfelagtige karakter.
Kyk nou of wag vir DVD?
Dis nie die moeite werd om jou huis hiervoor te verlaat nie; jy kan maar vir die DVD wag en rustig en op jou tyd hierdeur sit. Forsaken, Jane Got a Gun.
Olivia Wilde sou aanvanklik die hoofrol vertolk het, maar toe sy aan ’n ander rolprent moes werk, het Britt Marling dit gekry.
Julia Hart se draaiboek het jare lank op die rak gelê en niemand wou dit verfilm nie, tot Daniel Barber ingestem het om ’n rolprent daarvan te maak.
Sam Worthington het veral naam gemaak in die gewildste rolprent nog, Avatar. – LEON VAN NIEROP