BYNA DOOD NÁ INSPUITING
Jacques het breinskade opgedoen weens ’n hewige allergiese reaksie op ’n kleurstof vir ’n oogondersoek
DIS ’ n roetine-inspuiting wat elke dag in talle wêrelddele deur oogspesialiste toegedien word; Jacques Greyling was dus nie onrustig toe die tegnikus, oftewel die oogspesialis se assistent, hom op die binneaarse toediening voorberei nie. Dié Welkomiet was gretig om sy besige werk- en sosiale lewe te hervat ná die laserbehandeling wat sou volg vir die “lastige” swart kol in die sig van sy linkeroog. In die wagkamer het sy lewensmaat, Rocco Smith, rustig ’n tydskrif gelees.
Maar wat volgende gebeur het, was allesbehalwe roetine.
Fluoresseïen is ’n kleurstof wat algemeen binneaars toegedien word voor ’n angiogram van die retina. Die kleurstof merk “lekkasies” as die retina siek is. Die kamera se filter sal dié vog as wit kolle vertoon. Die middel word as veilig beskou. Maar toe die fluoresseïen in Jacques (33) se aar begin vloei, het ’n uiters seldsame allergiese reaksie van “een uit ’n miljoen” gebeur – en die volgende oomblik het die hospitaalpersoneel om sy lewe geveg nadat sy hart gaan staan het. (Sien die kassie.)
Sy liggaam het in anafilaktiese skok gegaan: ’n hewige allergiese reaksie waartydens sy bloeddruk kwaai geval en sy hart gaan staan het.
In die wagkamer het Rocco (43) bewus geraak van ’n geskarrel onder die personeel en gevra wat aangaan. Hy is daarvan verseker Jacques is oukei. Maar toe volg hy die verpleegsuster na die vertrek waar sy lewensmaat was en sien geskok hoe hy op die vloer lê. “Jacques het nie beweeg nie. Hulle het resussitasie- en suurstofmasjiene daar gehad.”
Nooddienswerkers het opgedaag en hom met adrenalien en die allergie-teenmiddel epidrien ingespuit. Ná wat vir Rocco soos ure gevoel het, het Jacques weer ’n polsslag gehad. Hy is saam met Jacques in ’n ambulans na die Rosepark Privaat Hospitaal, waar hy in die neuro-waakeenheid opgeneem is weens swelling op die brein.
Rocco vertel voorlopige skanderings het getoon hy het breinskade opgedoen weens die tekort aan suurstof terwyl sy hart stilgestaan het. Hy sou twee weke in die hospitaal moes bly en het daar ook ’n epileptiese aanval gehad. “Jacques was wakker, maar het byna soos ’n baba gehuil,” sê Rocco. Die dokters het gewaarsku: ‘Soos hy daar lê, so gaan hy waarskynlik vir die res van sy lewe wees.’ ”
Dit was laat Februarie. Waar ons van- dag met die twee mans in hul huis in Welkom gesels, toon Jacques steeds die gevolge van dié “roetine-inspuiting”. Hy praat moeisaam. Sy tong sleep. Sy sig het verder verswak. Hy kan tussen dag en nag onderskei, maar van mense sien hy net die dowwe buitelyne. “Jy’s net afgesny van die wêreld,” sê hy en vee oor sy nat oë.
Maar hoekom het Jacques se gestel so traumaties op die fluoresseïen gereageer? Die twee beweer dis weens ’n rampspoedige reaksie tussen die kleurmiddel en dit wat Jacques vermoed ’n allergie vir waatlemoen is, hoewel dit nooit medies by hom gediagnoseer is nie. Hulle het ’n prokureur gevra om ’n moontlike saak van nalatigheid teen die oogspesialis en tegnikus te ondersoek omdat hulle nie vir Jacques gevra het of hy allergies vir waatlemoen is nie.
Dorothea Voges, die regsverteenwoordiger van die spesialis en tegnikus, wou by navraag geen kommentaar lewer nie omdat die voorval nog ondersoek word. En ’n mediese kenner vertel hy het nog nooit gehoor van ’n verband tussen waat-