SO ’N ALLERGIE IS BITTER SKAARS
Hy het nog nooit ’n geval teëgekom van ’n kruisallergie tussen fluoresseïen en waatlemoen nie, sê prof. David Meyer, hoof van oftalmologie in die fakulteit gesondheidswetenskappe aan die Universiteit Stellenbosch.
“Sowat een uit elke 100 mense toon wel newe-effekte met die binneaarse toediening van fluoresseïen. Naarheid of braking kan binne ’n minuut of twee voorkom.”
Navorsing uit die 1980’s toon net een uit elke 222 000 mense wat allergies is vir die middel, sterf nadat hulle dit ingekry het.
In sy loopbaan van 30 jaar het hy nog net een keer ’n noodlottige allergiese reaksie beleef, sê hy.
Dr. Jaco van Niekerk, ’n Kaapse oogarts, het in sy 18 jaar nog nie ’n allergiese reaksie op fluoresseïen gesien nie.
“Hy (Jacques) was waarskynlik daardie een uit 500 000 tot ’n miljoen wat allergies is vir die middel, nes talle mense vir die reaktiewe bestanddele in penisillien, bysteke, skulpvis en selfs waatlemoen is.”
Tydens ’n allergiese reaksie identifiseer die liggaam die aktiewe bestanddele in byvoorbeeld die fluoresseïen of penisillien as vreemd en reageer hewig om homself te beskerm. “Daar is geen manier om vooraf te weet of die pasiënt in skok sal gaan nie. Dit is uiters seldsaam, maar bly ’n werklikheid en die pasiënt moet ingelig word.”