YSTERVROU OP MOOI POLVYE
JARE gelede het sy op die amptelike kongres van die Britse Konserwatiewe Party opgedaag in hoëhakskoene met luiperdkolle. ’n Paar jaar later het sy dieselfde kongres in blinkhelder goue stewels bygewoon. Dan was daar die keer toe sy die koningin moes ontmoet en vir die geleentheid ’n paar plastiek reënstewels aangetrek het. Jare lank het die Britse pers graag gespot oor die eienaardige skoene wat hul minister van binnelandse sake, Theresa May, na amptelike geleenthede dra. En omdat hulle so op haar skoene gefokus het, kon mense maklik iets veel meer merkwaardigs oor haar miskyk: Die vrou wat daardie bont skoene vol gestaan het, was op pad om die invloedrykste mens in die Britse politiek te word.
Pas voor hierdie uitgawe van Huisgenoot drukpers toe gegaan het, het Brittanje se uittretende premier, David Cameron, aangekondig hy gaan teen Woensdag 13 Julie amptelik sy pos ontruim om deur May opgevolg te word.
En, as alles volgens plan verloop het, sou sy eensklaps die eerste vrou sedert die Ystervrou, Margaret Thatcher, word wat aan die stuur van die Britse regering staan.
Sowat ’n maand gelede is die politiek in Brittanje meteens op sy kop gekeer toe die inwoners van dié land in ’n referendum stem hul land moet die Europese Unie (EU) verlaat. Cameron, wat hard baklei het om in die EU te bly, het kop onderstebo aangekondig hy gaan dan maar as eerste minister moet bedank (Die lewe ná Brexit, 7 Julie).
Wat gevolg het, was ’n woeste stryd om hom op te volg. Aangesien daar geen voor die hand liggende kandidaat in die regerende Konserwatiewe Party (kortom bekend as die Tories) was nie, is ’n paar name in die hoed gegooi. Een ná die ander het uitgeval, tot net twee kandidate staande was: May en Andrea Leadsom, minister van energie en klimaatsverandering.
Gou het dit duidelik geword May gaan dié stryd wen. Peilings het aangedui sy het 60 persent van die steun in haar party. Haar posisie is versterk deur Leadsom se gewoonte om van tyd tot tyd haar voet in haar mond te steek.
Een van haar ongewildste uitsprake was toe sy op ’n kol sê sy sal ’n beter leier as May (59) wees omdat sy kinders het en May nie. Mense met kinders beplan beter vir die toekoms omdat hulle oor hul kinders besorg is, het Leadsom geredeneer. “Ja, ek is seker Theresa is spyt sy het nie kinders nie; ek wil nie hê dit moet gaan oor ‘Andrea het kinders, Theresa het nie,’ want dit sal aaklig wees. Maar ek dink werklik om ’n ma te wees beteken jy het ’n regte, tasbare belang in die toekoms van die land,” het Leadsom in ’n onderhoud gesê.
Vir dié opmerking is sy omtrent in die pers gelooi. Al het May in haar jare as parlementslid nie veel oor haar persoonlike lewe gepraat nie, weet baie mense dit is vir haar en haar man, Philip (59), baie pynlik dat hulle nie eie kinders het nie.
Nie net die media en lede van die publiek het teen Leadsom uitgevaar nie; ook ’n medeparlementslid van die Kon-