NIERE POOTJIE ADAM NIE
DIE Sand du Plessis-teater in Bloemfontein was op daardie Maandagaand gepak. Op die verhoog was die voormalige Romanz-sanger Adam Barnard as deel van die lofprysingsproduksie Halleluja SA, wat nou deur die land toer. Die gehoor het hom toegejuig, salig onbewus daarvan dat hy deurtrek was van die pyn.
Nog minder het hulle geweet hy was tot sowat twee uur voor die opvoering sou begin, in die plaaslike Mediclinic se ongevalle-eenheid. Daar het dokters hom vir ontwatering behandel en hy het twee binneaarse toedienings gekry om sy nierfunksie te stabiliseer. Die volgende dag het hy gehoor hy moet ’n nieroorplanting kry.
Maar eintlik is hy ’n baie geseënde man, sê Adam (31) nou. “Baie ander mense moet jare lank op ’n geskikte nier wag, maar ses mense het klaar gesê hulle sal een van hul niere vir my skenk.”
Sy dokter het reeds begin voorberei vir die operasie in Februarie aanstaande jaar. Dit behels onder meer om die geskikste skenker te identifiseer en Adam se liggaamskrag op te bou.
Hy het al van sy kinderdae af las met sy niere, vertel Adam op die Vrystaatse dorp Parys, waar hy die afgelope twee jaar woon. Omdat sy niere sukkel om die liggaamsoute en sure uit te skei, is sy kaliumvlak onder standaard.
Chroniese medikasie het sy niere se werking ondersteun, maar op daardie dag in Bloemfontein wou dit nie meer help nie . . .
Vir die eerste keer sedert hy verlede maand in die hospitaal beland het, vertel hy presies wat gebeur het. ’n Ernstige verkoue het hom beetgepak ’n paar dae voor ’n naweek dat die Halleluja SAproduksie drie optredes gehad het. Die oplossing? ’n Groot dosis antibiotikum en ander griepmedikasie. Dit alles was te veel vir sy niere.
Die Maandagoggend op pad na die vertoning in die Rosestad het hy in die motor gekrul van die pyn. Sy agent, Henri Scott, het bestuur. Hy tree ook saam met Adam in die lofprysingsproduksie op.
In Bloemfontein is Adam dadelik na die ongevalle-eenheid gebring waar hy gestabiliseer is. Sy toestand was so ernstig dat die mediese personeel wou hê hy moet sy optrede kanselleer, maar die Deur sanger het volstrek geweier. Hy moes toe ’n vrywaringsvorm onderteken dat hy homself op eie risiko ontslaan.
Daardie aand op die verhoog wou hy kort-kort flou word, vertel Adam, wat verlede jaar die Huisgenoot-Tempotoekenning vir nuweling van die jaar gekry het vir sy debuutsoloalbum, Ruk My tot Stilstand. Sy tweede soloalbum, Seisoene in die Son, is in April vanjaar uitgereik.
Die dag ná die vertoning waarmee hy dapper deurgedruk het, is Adam in die Jakaranda- hospitaal in Pretoria opgeneem vir verdere behandeling. Daar het dokters vir hom gesê hy sal ’n nieroorplanting moet ondergaan.
Hy is vier dae later ontslaan sodat hy betyds kon wees vir ’n optrede in Nelspruit. “Ek kla nie oor my siekte nie, want daar is ander mense wat baie sieker is,” sê Adam. Boonop het hy sy vrou, Almitra (28), aan sy sy. Dié ondersteun hom in hierdie tyd. Hy eet ’n appel om die hongerpyne te stil. Hy mag nie meer groot etes verorber nie, want dan is die werklas op sy niere te groot.
“Nou peusel-peusel ek maar so deur die dag,” verduidelik hy. Alle vleis is ook taboe. Die spesiale eetprogram wat hy nou volg, bestaan net uit stysel, vrugte, groente, water en rooibostee.
Hoe voel hy oor die operasie wat wag? Hy beskou dit as ’n “herstel”-knoppie om van voor af te begin, sê Adam met ’n tikkie opgewondenheid in sy stem.
Intussen is dit ’n geval van die vertoning moet voortgaan. Nog 50 Halleluja SA-produksies lê vir hom voor. En wil hy geeneen daarvan kanselleer nie, al is sy lyf hoe seer.