RENAULT KADJAR 1.6 DCI DYNAMIQUE 4WD Kan ek jou superheld wees?
Renault het nie ’n geskiedenis van vierwielaangedrewe rygoed nie, maar hulle is in ’n alliansie met Nissan, wat beteken die twee maatskappye deel alles van elektriesemotortegnologie tot viertrekstelsels.
So het Nissan vir Renault in staat gestel om die Kadjar, wat in wese ’n Nissan Qashqai is, te bou. Maar deur sy voorkoms – binne en buite – vestig hy sy eie identiteit. Sy bakontwerp herinner aan Superman of ’n gespierde Springbokrugbyspeler, iemand soos Eben Etzebeth, in ’n rekstofrugbytrui. Dit maak die Kadjar moontlik die aantreklikste sportnutsvoertuig wat jy kan koop.
Binne is oorgenoeg plek vir ’n gesin van vier en hul naweekbagasie of meer. Die gehalte van die plastiek wat by die voorpaneel gebruik word, is hoog en troef die Qashqai s’n.
’n Kragtige, suinige 1,6 Ldieselenjin met turboaanjaer (uit die Qashqai) dryf die Kadjar aan. Dis gekoppel aan ’n sesganghandratkas wat maklik skakel. Ook die koppelaar werk maklik, maar ’n mens moet die versneller met die wegtrekslag ver genoeg intrap, anders vrek die enjin. En dis die enigste vlieg in die salf, want ’n outomatiese ratkas maak die ry van ’n turbodieselkar meer van ’n plesier en minder soos iets wat na werk voel. Dis omdat turbodieselenjins laag in die enjin se toerestrek min wringkrag ontwikkel, dan ’n stortvloed daarvan teen effens hoër omwentelings en dan weer niks behalwe geraas en rook nie.
Die topweergawe van die Kadjar het vierwielaandrywing en is omvattend toegerus, maar is nie die vrygewigste in sy klas nie. Van die toerusting kos ekstra, soos verhitbare leersitplekke teen R12 000. Maar ’n puik satnavstelsel en LEDhoofligte is deel van sy standaardtoerusting.