NUUT IN DIE FLIEKS / CELL
Wetenskapsfiksie. Met Samuel L. Jackson, John Cusack en Isabelle Fuhrman. Regisseur: Tod Williams. 16GrG. Begin op 22 Julie .
Waaroor gaan dit?
’n Groot deel van Amerika, spesifiek Nieu-Engeland, word lamgelê toe ’n geheimsinnige selfoonsein al die mense in zombies verander wat net wil moor terwyl hulle na die sein luister. ’n Pa wie se selfoonbattery pap geraak het, ontsnap die gruwel en soek sy seun.
Wie sal hiervan hou?
Dis nie een van Stephen King se beste romans dié nie en moes eintlik nooit die binnekant van ’n rolprentteater gesien het nie. Dit is in elk geval ’n lawwe gewoonte om elke roman van hierdie meesterrillerskrywer te verfilm. Die storie is erg vermoeiend en ’n mens sukkel om by te hou en jou oë oop te hou. Daar is net vyf tonele te veel met gillende, moorddadige zombies wat op die kamera afpyl.
John Cusack, wat gewoonlik skurke speel, is ook nie juis suksesvol as ’n held nie. ’n Mens betrap jouself dat jy nie in sy dapper pogings glo nie. Samuel L. Jackson het meer gesag as hy; daarom is die kombinasie van die twee persoonlikhede ongelyk.
Boonop ken ons teen hierdie tyd die King-resep. Neem iets doodgewoons soos ’n selfoon en omskep dit in ’n buitengewone gruwelmonster wat die mensdom verslaaf maak en buite beheer laat raak, en dit dien as wegspringplek vir ’n onwaarskynlike storie wat net in ’n King-wêreld kan bestaan. Die openingstonele op ’n lughawe is onthutsend, maar daarna daal die rolprentgrafiek na net onder gemiddeld. Boonop is die fotografie te donker, seker om die donker tema te weerspieël en te steun, maar dit raak werklik ná ’n ruk eentonig en uitmergelend.
Kyk nou of wag vir DVD?
Dit moes eintlik reguit DVD toe gegaan het, dus kan jy gerus wag tot dit eendag daarop verskyn. Dit sal in jou voorhuis meer aanvaarbaar wees. The Mist, The Stand. Eli Roth van Hostel-faam sou die regie behartig het, maar toe hy en die vervaardigers bots, is hy deur Tod Williams vervang. Die rolprent het twee jaar op die rak gelê weens verspreidingsprobleme. – LEON VAN NIEROP